აზერბაიჯანის პრეზიდენტის, ილჰამ ალიევის მმართველი პარტია “ენი აზერბაიჯანი” ქვეყანაში გამართული ვადამდელი საპარლამენტო არჩევნების წინასწარი შედეგების მიხედვით, საპარლამენტო უმრავლესობას შეინარჩუნებს.
ცენტრალურმა საარჩევნო კომისიამ განაცხადა, რომ ალიევის პარტიამ პარლამენტში 125 ადგილიდან 68 მოიპოვა. წინა მოწვევის პარლამენტში მას 69 ადგილი ჰქონდა. პარლამენტის წევრად 44 დამოუკიდებელი კანდიდატი აირჩიეს, სხვა პარტიებმა კი, რომლებიც მხარს უჭერენ მთავრობას, დარჩენილი ადგილები გაინაწილეს.
1 სექტემბერს გამართულ არჩევნებზე, ამომრჩეველთა აქტივობამ 37,27% შეადგინა, ჯამში ქვეყანაში რეგისტრირებულია დაახლოებით 6 421 000 ამომრჩეველი.
2024 წელს ეს უკვე მეორე არჩევნებია აზერბაიჯანში, სანამ მოქალაქეები პარლამენტის წევრებს აირჩევდნენ, 7 თვის წინ, ხმა მისცეს საპრეზიდენტო არჩევნებში, სადაც ილჰამ ალიევმა გაიმარჯვა. ეს აზერბაიჯანის პირველი საპარლამენტო არჩევნებია მას შემდეგ, რაც ფართომასშტაბიანი სამხედრო ოპერაციის შემდეგ სომეხმა მოსახლეობამ ფაქტობრივად სრულად დატოვა მთიანი ყარაბაღის ტერიტორია.