რუსეთის თავდასხმებს უკრაინაში, გასული დღის განმავლობაში, სულ მცირე სამი მშვიდობიანი მოქალაქე ემსხვერპლა, დაშავებულია 19. ამის შესახებ ინფორმაციას რეგიონული ხელისუფლება ავრცელებს.
გუბერნატორის, ვადიმ ფალაშკინის განცხადებით, დონეცკის ოლქში 2 ადამიანი დაიღუპა და ოთხი დაშავდა. ქალაქ ტორეცკზე რუსეთის თავდასხმას ერთი ადამიანი ემსხვერპლა, მეორე კი დაშავდა. კიდევ ერთი ადამიანი დაიღუპა ილინივკაში. ორი კოსტიანტინივკაში და ერთი ბერესტოკში კი დაშავდა.
ხარკოვში, გუბერნატორ ოლეგ სინეგუბოვის ცნობით, რუსული თავდასხმების დროს რვა მშვიდობიანი მოქალაქე დაშავდა. ეს მაჩვენებელი მოიცავს: ორ დაშავებულს ქალაქ ლოზოვაში, ორს სოფელ კურილივკაში, სამს კუპიანსკის რაიონში და ერთს სოფელ ვოლოხივსკეში.
გუბერნატორ ალექსანდრ პროკუდინის თქმით, ხერსონში თავდასხმებს ერთი ადამიანი ემსხვერპლა, 7 კი დაშავდა. დაზიანებულია სამედიცინო დაწესებულება, ადმინისტრაციული შენობა, რვა მაღალსართულიანი კორპუსი, 24 სახლი და რამდენიმე მანქანა.
ასევე, რუსებმა შეუტიეს ჩერნიგოვის, დნეპროპეტროვსკის, კიევის, ლუგანსკის, მიკოლაევის, სუმის, ჟიტომირის და ზაპოროჟიეს ოლქებს, თუმცა თავდასხმას მსხვერპლი არ მოჰყოლია.