ზუგდიდის მერიის შესაბამისმა სამსახურებმა გუშინ საღამოს დაწყებული სამუშაოები დილისკენ დაასრულეს: ქალაქის ცენტრში, თავისუფლების მოედანზე არსებული შადრევანი აღებულია. ტერიტორია დილიდან ასე გამოიყურება:
უამინდობის მიუხედავად, დემონტაჟი მთელი ღამის განმავლობაში მიმდიონარეობდა. დილისთვის შადრევანი აღარ იყო. როგორც ზუგდიდის მუნიციპალიტეტის მერია აცხადებს, დემონტაჟი შადრევნის აღდგენა-რეკონსტრუქციის მიზნით მოხდა, გამოცხადებულია ტენდერი.
მერიის განცხადებაში ასევე, ვკითხულობთ, რომ დღეის მდგომარეობით შადრევანი დაზიანებული და საფრთხის შემცველია, შელახულია ვიზუალურად და აღდგენას საჭიროებს მისი არქიტექტურული ნაწილიც.
ზუგდიდში, თავისუფლების მოედანზე შადრევანი მიხეილ სააკაშვილის ხელისუფლების დროს დამონტაჟდა. ის კოლხური მითოსის ელემენტებით შემკული, სამი იარუსისგან შემდგარი შადრევანია, რომლის ზედა ნაწილში “ვარდების რევოლუციის” სიმბოლოდ მოზაიკა იყო დამატებული.
ადგილობრივი მოსახლეობის ნაწილი ამბობს, რომ შადრევანს ამ სახით უკან აღარ დააბრუნებენ და ის ზუგდიდისა და ცაიშის ეპარქიის თხოვნით აიღეს, რადგან ზუგდიდში შემოსვლის დროს ხედში ღვთისმშობლის მოზაიკას ფარავდა.