რუსეთის მე-2 დასავლეთ ოლქის სამხედრო სასამართლომ, უკრაინის უმაღლესი რადას დეპუტატს ალექსეი გონჩარენკოს დაუსწრებლად 10 წლით თავისუფლების აღკვეთა მიუსაჯა.

გონჩარენკო რუსულმა სასამართლომ “დამნაშავედ” ცნო პოლიტიკური სიძულვილის საფუძველზე „სამხედრო ფეიქების“ გავრცელებაში (რუსეთის ფედერაციის სისხლის სამართლის კოდექსის 207.3 მუხლის მე-2 ნაწილი), ტერორიზმის გამართლებაში (რუსეთის ფედერაციის სისხლის სამართლის კოდექსის 205.2 მუხლის მე-2 ნაწილი) და სიძულვილის წაქეზებაში ძალადობის მუქარით (სსკ-ის 282-ე მუხლის მე-2 ნაწილი).

კონკრეტულად რა გახდა უკრაინელი დეპუტატის სისხლისსამართლებრივი დევნის მიზეზი, უცნობია.

“ვიღებ მილოცვებს!” – ასე ეხმაურება თავად უკრაინელი დეპუტატი ოკუპანტის გადაწყვეტილებას:

“სასჯელში წერია, რომ სამი წელი ციხეში უნდა გავატარო, დანარჩენი შვიდი – საერთო რეჟიმის კოლონიაში. გარდა ამისა, სამი წლით ამიკრძალეს საიტების ადმინისტრირება.
ვიღებ მილოცვებს! რუსეთში ნასამართლევი პირველი სახალხო დეპუტატი!” წერს გონჩარენკო სოციალურ ქსელში.

გონჩარენკო უკრაინი რადას წევრია პეტრო პოროშენკოს “ევროპული სოლიდარობის” პარტიიდან.