2024 წლის 4 ივნისს, ნიუ-იორკში, გაერო-ს გენერალურმა ასამბლეამ, 78-ე სესიის ფარგლებში, მიიღო საქართველოსა და მსოფლიოს სხვადასხვა რეგიონის 63 ქვეყნის მიერ ინიცირებული რეზოლუცია – “აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო იძულებით გადაადგილებულ პირთა და ლტოლვილთა სტატუსის შესახებ”.

რეზოლუციას 103-მა ქვეყანამ დაუჭირა მხარი. კენჭისყრაში მონაწილეობისგან თავი შეიკავა და შესაბამისად, მას მხარი არ დაუჭირა საქართველოს სტრატეგიულმა პარტნიორმა ჩინეთმა. ჩინეთთან სტრატეგიული პარტნიორობა გასული წლის ზაფხულში, მაშინდელი პრემიერის, ირაკლი ღარიბაშვილის ვიზიტის დროს გაფორმდა. ეს იყო პირველი კენჭისყრა გაეროში სტრატეგიული პარტნიორობის დამყარების შემდეგ. ჩინეთის მსგავსად, რეზოლუციას მხარი არ დაუჭირა ირანმაც.

რეზოლუციის მოწინააღმდეგე 9 ქვეყანა იყო. საქართველო აღნიშნულ რეზოლუციას გაერო-ს გენერალურ ასამბლეაზე 2008 წლიდან წარადგენს.

გაერთიანებული ერების ორგანიზაციასთან საქართველოს მუდმივი წარმომადგენლის, დავით ბაქრაძის ანცხადებით, რეზოლუციას წელს მხარი დამატებით სამმა სახელმწიფომ – სომხეთმა, არგენტინამ და სამხრეთ აფრიკამ დაუჭირა.

“რეზოლუცია გმობს რუსეთის მიერ ოკუპირებულ საქართველოს რეგიონებში ძალისმიერი გზით განხორციელებულ დემოგრაფიულ ცვლილებებს, ადასტურებს დევნილთა უფლებას, ეთნიკური კუთვნილების მიუხედავად, დაბრუნდნენ საკუთარ სახლებში ღირსეულად და უსაფრთხოდ და ხაზს უსვამს მათი საკუთრების უფლების პატივისცემისა და დაცვის აუცილებლობას.

რეზოლუცია ასევე მოუწოდებს ჟენევის მოლაპარაკებების მონაწილეებს, გაააქტიურონ ძალისხმევა რუსეთის მიერ ოკუპირებულ საქართველოს რეგიონებში უსაფრთხოებისა და ადამიანის უფლებების კუთხით არსებული მდგომარეობის გასაუმჯობესებლად, რაც, თავის მხრივ, ხელს შეუწყობს იძულებით გადაადგილებულ პირთა და ლტოლვილთა საკუთარ სახლებში დაბრუნების პროცესს”, – წერია საგარეო საქმეთა სამინისტროს განცხადებაში.