სტუდენტების პროტესტი სახელმწიფო უნივერსიტეტში ინაცვლებს. დღეს ზუსტად 18:0 საათზე ახალგაზრდები რუსული კანონის მოწინააღმდეგეებს თსუ-ს პირველ კორპუსთან ელოდებიან. პროტესტის სათავეში მოქცეული თაობა სწორედ უნივერსიტეტის ეზოდან გააპროტესტებს ხელისუფლების პრორუსულ ქმედებებს და რუსული კანონის მომხრე პრემიერის საქციელსაც, რომლის თანდასწრებითაც სტუდენტს ფიზიკურად გაუსწორდნენ.
ახალგაზრდები არ აპირებენ შეეგუონ იმ აზრს, რომ ხელისუფლებას რუსული კანონის მიღება აქვს გადაწყვეტილი, ამიტომ აანონსებენ, რომ პროტესტი იქნება უწყვეტი და სიურპრიზებით სავსე.
გარდა ამისა, ახალგაზრდები საინფორმაციო კამპანიას აანონსებენ და ამბობენ, რომ რუსული კანონის საფრთხეებზე ინფორმაციას ყველა ადამიანს მიაწვდიან.
დღეს შევიკრიბებით თსუ-თან 18:00 საათზე, რათა კიდევ ერთხელ გავაგონოთ თსუ-ელების ხმა ყველას. სწორედ ეს უნივერსიტეტი იყო ყოველთვის ყველა პროტესტის ეშელონში და ვფიქრობ, რომ ეს ძველი დიდება უნდა დაუბრუნდეს თსუ-ს, – ამბობს სტუდენტი დავით სეხნიაშვილი.
აქციის ორგანიზატორი გიორგი დუმბაძე კანონპროექტის მეორე მოსმენაზე მასშტაბურ პროტესტს აანონსებს. სტუდენტი პირდაპირ ამბობს, რომ რუსული კანონის წინააღმდეგ გამოსვლა ახალგაზრდების მომავლისთვის არის მნიშვნელოვანი.
მეორე მოსმენაა ჩვენთვის ყველაზე მნიშვნელოვანი, იმიტომ, რომ მეორე მოსმენისთვის ვგეგმავთ, რომ აბსოლუტურად ყველა, პოლიტიკური პარტიები იქნება, არასამთავრობოები, ჩვენ, სტუდენტები თუ სხვა ნებისმიერი, ყველა ერთად გავერთიანდებით და ერთად ვიდგებით იქ, სადაც საჭიროა. ჩვენ ვაპირებდით ისედაც, რომ უნივერსიტეტების სივრცეებში გადავსულიყავით, ვინაინდა ყველაზე მეტად ვისაც ეხება ეს კანონი, არიან სტუდენტები და მათი ჩართულობა თავინათი მომავლისთვისვე არის უმნიშვნელოვანესი, – ამბობს გიორგი დუმბაძე.