მაკკეინის ინსტიტუტის აღმასრულებელი დირექტორი და აშშ–ის სახელმწიფო მდივნის თანაშემწის ყოფილი მოადგილე ეველინ ფარკასი, რომლის კომპეტენციის სფეროში შედიოდა რუსეთი და კავკასიაც, არ გამორიცხავს, რომ აშშ–მა სანქციები დააწესოს, თუ საქართველო რუსულ კანონს მიიღებს.
როგორც მან “აქცენტთან” საუბრისას აღნიშნა, ვარაუდობს, რომ აშშ უკვე განიხილავს სანქციების საკითხს და ამ კანონის მიღება გადაწყვეტილებას მხოლოდ დააჩქარებს.
“მე ვვარაუდობ, რომ აუცილებლად იქნება სანქციები, თუ საქართველოს რესპუბლიკა მსგავს კანონს მიიღებს. ნებისმიერ შემთხვევაში, საქართველომ დაარღვია სანქციები რუსეთის წინააღმდეგ და ამიტომ, ამ კონტექსტში, მე კარგად წარმომიდგენია, რომ აშშ-ის მთავრობა უკვე განიხილავს სანქციების გამოყენების შესაძლებლობას მათ მიმართ, ვინც უზრუნველყოფს ფინანსურ და მატერიალურ დახმარებას უკრაინის წინააღმდეგ რუსეთის აგრესიული ომის მხარდასაჭერად. ეს [კანონის მიღება] მხოლოდ ერთგვარი სტიმული იქნება სწრაფი გადაწყვეტილების მისაღებად” ამბობს ფარკასი.
შეგახსენებთ, ჟურნალისტის კითხვაზე, გამოიწვევს თუ არა კანონის მიღება სანქციებს, აშშ-ის სახელმწიფო დეპარტამენტის სპიკერმა, მეთიუ მილერმა უპასუხა, რომ ეს ჯერ კანონპროექტია და ამ ეტაპზე სათქმელი არაფერია – “თუ მას მიიღებენ, დაგვაკვირდით”.