“ევროკავშირში რომ სერიოზულად დაიწყება საუბარი ქვეყნისთვის კანდიდატის სტატუსის შეჩერებაზე, ეს უკვე შემდგარი კატასტროფა მგონია,” – ამის შესახებ “ახალის” თანათავმჯდომარე სოციალურ ქსელში წერს. ნიკა გვარამია ამით “ქართული ოცნების” მიერ “რუსული კანონის” ხელახლა ინიცირებაზე პარტნიორების განცხადებებს ეხმაურება.

“ევროკავშირში რომ სერიოზულად დაიწყება საუბარი ქვეყნისთვის კანდიდატის სტატუსის შეჩერებაზე, ეს უკვე შემდგარი კატასტროფა მგონია, მეგობრებო. არ უნდა “ქართულ ოცნებას” კანდიდატის სტატუსი, მეგობრებო. “აწყობს-შმაწყობს” ლოგიკა და საერთოდ არანაირი ლოგიკა არ მუშაობს, როცა დაკვეთებს რუსეთიდან იღებ და ასრულებ,” – წერს ნიკა გვარამია.

რა ხდება:
3 აპრილს ცნობილი გახდა, რომ “ქართულმა ოცნებამ” პირობა ისევ გადათქვა და “რუსულ კანონის” დაბრუნება გადაწყვიტა. უმრავლესობის ლიდერმა მამუკა მდინარაძემ თქვა, რომ კანონი მიმდინარე სესიის ბოლომდე იქნება სამივე მოსმენით მიღებული. კანონპროექტის ტექსტში განსხვავება მხოლოდ ტერმინი “უცხოური ძალის ინტერესების გამტარებელი ორგანიზაცია” იქნება, ნაცვლად “უცხოური გავლენის აგენტისა.” მდინარაძის თქმით, ყველა სხვა ჩანაწერი უცვლელია.

“ოცნების” ამ გადაწყვეტილებას არასამთავრობო ორგანიზაციები და სამოქალაქო საზოგადოება კვლავ ეწინააღმდეგება. მას კვლავ კრიტიკული განცხადებებით ეხმაურებიან ჩვენი დასავლელი პარტნიორებიც. ევროპარლამენტარი პეტრას აუსტრევიჩუსი კი არ გამორიცხავს, რომ “რუსული კანონის” მიღების შემთხვევაში, კითხვის ნიშნის ქვეშ დადგეს არამხოლოდ კანდიდატის სტატუსი, არამედ ვიზალიბერალიზაციაც.