ენგურჰესის გენერალური დირექტორი ლევან მებონია ჭიქაში ატეხილ ქარიშხალს უწოდებს ენგურის ხიდზე ტრანსფორმატორის გადატანის ამსახველი ვიდეოკადრების გავრცელებას აფხაზური ინტერნეტმედიასაშუალებებით.
კადრები ტელეგრამ-არხებმა გაავრცელეს და მათმა გამოქვეყნებამ ვნებათაღელვა გამოიწვია, რადგან აფხაზურენოვანი იუზერები წერდნენ, რომ თბილისის მიერ კონტროლირებად ტერიტორიაზე ტრანსფორმატორის გადატანა აფხაზეთის დე ფაქტო ხელისუფლებასა და საქართველოს ხელისუფლებას შორის საიდუმლო შეთანხმების არსებობას ადასტურებს.
ლევან მებონია კი განმარტავს, რომ ტრანსფორმატორი 2017 წელს გადაიტანეს ოკუპირებული აფხაზეთის ტერიტორიაზე და ენგურჰესის ერთ-ერთ ქვესადგურზე დააყენეს, ახლა კი ის ნაწილებად დაშალეს, რადგან შეკეთებას საჭიროებს და სწორედ ამიტომ, ენგურის ხიდის გავლით, წყალტუბოში გადაიტანენ, რის შემდეგაც უკან დააბრუნებენ.