საქართველოში ბავშვები დასაცავები არიან შიმშილისგან, გაჭირვებისგან, პედოფილებისგან… – ანა ბუჩუკური

0
61

პოლიტიკური განცხადებები სესიაზე – ოპოზიცია ქვეყანაში არსებულ მძიმე სოციალურ პრობლემებზე საუბრობს.

პარტია „საქართველოსთვის“ დეპუტატმა, ანა ბუჩუკურმა პარლამენტში პლენარულ სხდომაზე სიტყვით გამოსვლისას განაცხადა, რომ “საქართველოში ბავშვები დასაცავები არიან შიმშილისგან, გაჭირვებისგან, პედოფილებისგან, ადრეულ ასაკში ქორწინებისგან, უდედოდ და უმამოდ გაზრდისგან, გაუნათლებლობისგან”:

საქართველოში ბავშვები დასაცავები არიან შიმშილისგან. ქვეყანაში ვეჯახებით მდგომარეობას, რასაც ბავშვთა მალნუტრიცია ჰქვია. ეს არის მდგომარეობა, რომელიც ვითარდება საკვების დეფიციტის დროს, ანუ მაშინ, როდესაც ბავშვი ვერ იღებს ყველა საჭირო საკვებ ნივთიერებას. ამ მდგომარეობას ხშირად „ფარულ შიმშილს“ უწოდებენ. ხოლო ხანგრძლივი პერიოდის განმავლობაში, კვებითი დეფიციტი იწვევს ზრდაში ჩამორჩენას და ხშირად იწვევს კოგნიტიური განვითარების შეფერხებას (დაბალ მიღწევებს სკოლაში და ინტელექტუალური შესაძლებლობების შემცირებას). ანუ მარტივად რომ ვთქვათ, ასეთ მდგომარეობაში ბავშვი უბრალოდ ვერ ვითარდება. 2022 წელს უნდა დაწყებულიყო საჯარო სკოლებში ე.წ. სასკოლო კვება. თუმცა ხელისუფლებამ ეს არჩევნებისთვის გადადო. იმედია, ახლა მაინც გააკეთებთ, თქვენი ინტერესია! მაგრამ უნდა გაკეთდეს ხარისხიანად, როგორც იყო დაგეგმილი და არა მორიგი კორუფციული სქემებით – რამდენიმე ადამიანის ჯიბის გასავსებად. ბავშვებზე ლაპარაკი! საქართველოში ბავშვები დასაცავები არიან გაჭირვებისგან. ჯანდაცვის სოციალური მომსახურების სააგენტოს ოფიციალური მონაცემებით საქართველოში საარსებო შემწეობას იღებს 175 585 ბავშვი. საქართველოში ბავშვები დასაცავები არიან პედოფილებისგან. საქართველოში ბავშვები დასაცავები არიან ადრეულ ასაკში ქორწინებისგან. სახალხო დამცველის ბოლო გამოქვეყნებული ანგარიშის მიხედვით, „2022 წელს 815 არასრულწლოვანი ორსული დარეგისტრირდა, ხოლო არასრულწლოვანთა მშობიარობის რიცხვი 434-ს აღწევს.“ საქართველოში ბავშვები დასაცავები არიან უდედოდ და უმამოდ გაზრდისგან. წარმოუდგენელია იმ ბავშვების დათვლა, რომელთა მშობლები, ხშირ შემთხვევაში – დედები, სოციალური და ეკონომიკური სირთულეების გამო მოშორებულები არიან საკუთარ შვილებს, ოჯახებს, სამშობლოს და ევროპასა და ამერიკაში არიან იძულებით სამუშაოდ გადასახლებულები. საქართველოში ბავშვები დასაცავები არიან გაუნათლებლობისგან. OECD-ის მოსწავლეთა შეფასების საერთაშორისო პროგრამის (PISA) ბოლო კვლევის მიხედვით, რომელიც 81 ქვეყნის მონაცემებს აერთიანებს, საქართველო OECD-ის საშუალო მაჩვენებლებს მის სამივე ნაწილში ჩამორჩება. ამავე კვლევის მიხედვით კი, წაკითხულის გააზრების მხრივ ქართველი მოსწავლეების მაჩვენებელი გაუარესდა. ასე, რომ დიახ, სამწუხაროდ – საქართველოში ბავშვები დასაცავები არიან! მაგრამ ხელისუფლებას ეს ბავშვები, ისიც დროებით, მხოლოდ არჩევნების წინ ახსენდება რატომღაც. ამას არ ჰქვია ბავშვებზე ზრუნვა. ეს მხოლოდ საკუთარი ძალაუფლების და პირადი კეთილდღეობის გახანგრძლივების მცდელობებია. კიდევ ერთხელ მოვუწოდებთ ხელისუფლებას – რაც შეიძლება სწრაფად დაიწყოს საჯარო სკოლებში ბავშვთა კვების უზრუნველყოფა და ნუ დაელოდებით არჩევნებს! შიმშილობენ ეს ბავშვები!“- განაცხადა ანა ბუჩუკურმა.

წინა სტატია“ოცნება” ერთპარტიულ ცესკოს ქმნის – აქუბარდია
შემდეგი სტატიასაქართველოზე შეყვარებული რუსი სპორტული ჟურნალისტი ვასილი უტკინი გარდაიცვალა
ტელეკომპანია ოდიშის საინფორმაციო სამსახური