რუსეთმა ოდესაზე სარაკეტო იერიში იმ დროს მიიტანა, როცა ერთმანეთს უკრაინის პრეზიდენტი და საბერძნეთის პრემიერმინისტრი ხვდებოდნენ.
ვოლოდიმირ ზელენსკისა და კირიაკოს მიცოტაკისის შეხვედრის დროს ოდესაში მძლავრი აფეთქების ხმა გაისმა. ბერძნული გამოცემა წერს, რომ სამიზნე, შესაძლოა, ზელენსკის ექსკორტი ყოფილიყო, რომელიც 150 მეტრში იყო იმ ადგილიდან, სადაც საბერძნეთის დელეგაცია იმყოფებოდა.
ერთობლივ პრესკონფერენციაზე ზელენსკიმ დაადასტურა, რომ რაკეტის აფეთქება დაინახა, შემდეგ კი განაცხადა, რომ აფეთქებას მსხვერპლი მოჰყვა და არიან დაჭრილებიც.
საჰაერო განგაშის სიგნალი ოდესაში მოსკოვის დროით 10:40 წუთზე გაისმა, სამი წუთის შემდეგ კი მას მძლავრი აფეთქების ხმა მოჰყვა.
თავად პრეზიდენტ ზელენსკისა და საბერძნეთის პრემიერის ექსკორტებში არავინ დაზიანებულა.
“ჩვენ ვნახეთ ეს დარტყმა გზაში და თქვენ ხედავთ, ვისთან გვაქვს საქმე – მათთვის სულერთია, სად დაარტყამენ. ვიცი, რომ იყო მსხვერპლი, არიან დაჭრილებიც, თუმცა, დეტალები ჯერ არ ვიცი”, – განაცხადა ზელენსკიმ პრესკონფერენციაზე.