წალენჯიხის მერი გია ხარჩილავა ქრთამის აღების ბრალდებით მერიის ორი თანამშრომლის დაკავებას კიდევ ერთხელ ეხმაურება და სპეცოპერაციის სავარაუდო მიზეზებზე საუბრობს.

“კორუფცია წალენჯიხის მერიაში – ამ სლოგანისთვის “ქართულმა ოცნებამ” სპეცოპერაციით გაწირა წალენჯიხის მერიის ორი თანამშრომელი, რომლებთანაც თვეების განმავლობაში მუშაობდა სუს-იდან მოვლენილი სპეც. აგენტი. ჩვენთვის მიუღებელია დანაშაულის პრევენციის ნაცვლად მოხდეს დანაშაულის პროვოცირება,” – ამბობს ხარჩილავა.

შეგახსენებთ, რომ წალენჯიხაში ქრთამის აღების ბრალდებით მერიის ორი თანამშრომელი 26 თებერვალს დააკავეს. სუს-ის მიერ ჩატარებული გამოძიების მიხედვით, მათ 1550 კვ.მ მიწის ნაკვეთის აუქციონზე გატანის სანაცვლოდ, მოქალაქეს ქრთამის სახით მოსთხოვეს და გამოართვეს 20 000 ლარი.

დაკავებულების წინააღმდეგ გამოძიება სისხლის სამართლის კოდექსის 338-ე მუხლის მე-2 ნაწილის „ბ“ და „გ“ (მოხელის მიერ წინასწარი შეთანხმებით ჯგუფურად დიდი ოდენობით ქრთამის აღება) ქვეპუნქტებით მიმდინარეობს, რაც სასჯელის სახედ და ზომად 7-დან 11 წლამდე თავისუფლების აღკვეთას ითვალისწინებს.