პუტინი ამტკიცებს, რომ უკრაინაში ომი რუსეთს არ დაუწყია და ამავე ინტერვიუში ნანობს, რომ ომი უფრო ადრე არ დაიწყო

0
77

რუსეთის პრეზიდენტი, ვლადიმერ პუტინი ისევ ამტკიცებს, რომ ომი უკრაინაში კრემლს არ დაუწყია, არამედ მის შეჩერებას ცდილობს. ამავე დროს, ინტერვიუში, რომელიც მან “როსია 1-ის” ჟურნალისტ, პაველ ზარუბინს მისცა, ნანობს, რომ ომი უფრო ადრე არ დაიწყო.

ინტერვიუს ნაწილში ჟურნალისტმა პუტინს კითხვა დაუსვა მანამდე ამერიკელი ჟურნალისტის, ტაკერ კარლსონისთვის მიცემულ ინტერვიუზე და დასავლეთის ლიდერების შეფასებაზე. პუტინი დასავლეთის ლიდერებს მისი სიტყვების დამახინჯებაში ადანაშაულებს – მისი თქმით, ინტერვიუში არ უთქვამს, რომ უკრაინაში “სპეციალური სამხედრო ოპერაციის” [ასე ეძახის რუსეთი ომს] დაწყება რუსეთზე ნატოს თავდასხმის საფრთხეს უკავშირდება.

“ჩვენ, რა თქმა უნდა, ვიყავით და ვართ შეშფოთებული უკრაინის ნატოში შეყვანის შესაძლებლობით, რადგან ეს საფრთხეს უქმნის ჩვენს უსაფრთხოებას. სწორედ ეს ვთქვი”, – თქვა პუტინმა.

მან კიდევ ერთხელ გაიმეორა ნარატივი, რომ უკრაინაში ომის დაწყების მიეზი გახდა მისი ამჟამინდელი ხელისუფლების “უარი მინსკის შეთანხმებების შესრულებაზე და უწყვეტი თავდასხმები მრავალი მსხვერპლით” ე.წ. ლუგანსკისა და დონეცკის რესპუბლიკებზე.

“როგორც ვთქვი, ჩვენ ომი არ დაგვიწყია, მხოლოდ მის შეჩერებას ვცდილობთ. პირველ ეტაპზე ჩვენ შევეცადეთ ამის გაკეთება მშვიდობიანი გზით – მინსკის შეთანხმებების დახმარებით. როგორც მოგვიანებით გაირკვა, გერმანიის ფედერაციული რესპუბლიკის ყოფილმა კანცლერმა, და საფრანგეთის ყოფილმა პრეზიდენტმა აღიარეს და პირდაპირ საჯაროდ განაცხადეს, რომ ისინი არ აპირებდნენ ჩვენი ამ შეთანხმებების შესრულებას, უბრალოდ, დროს იგებდნენ, უკრაინის რეჟიმის იარაღით კიდევ უფრო დატუმბვისთვის, რაც მათ წარმატებით გააკეთეს.

ერთადერთი, რაც შეგვიძლია ვინანოთ, არის ის, რომ ადრე არ დავიწყეთ აქტიური მოქმედებები, იმის რწმენით, რომ წესიერ ადამიანებთან გვქონდა საქმე”, – თქვა პუტინმა.

წინა სტატიადეკანოზი გიორგი მამალაძე თავისუფალია
შემდეგი სტატიაბრძოლა გრძელდება, საზოგადოების დიდმა ნაწილმა სიმართლე ისედაც იცის – დეკანოზ გიორგი მამალაძის პირველი კომენტარი
ტელეკომპანია ოდიშის საინფორმაციო სამსახური