გარემოს დაცვისა და სოფლის მეურნეობის მინისტრმა ოთარ შამუგიამ უპასუხისმგებლო უწოდა ცალკეულ მოსაზრებებსა და განცხადებებს, რომელთა მიხედვითაც, სტიქია ნერგეეთში წინასწარ პროგნოზირებადი იყო.
“სამწუხაროა, რომ ბოლო დღეების განმავლობაში ვისმენთ უპასუხისმგებლო განცხადებებს და სპეკულაციებს, თითქოს მომხდარი სტიქია წინასწარ პროგნოზირებული იყო და სახელმწიფომ არაფერი გააკეთა”, – თქვა მან.
ოთარ შამუგია დღეს პრემიერთან ერთად ქედის მუნიციპალიტეტში იმყოფებოდა და სტიქიის სალიკვიდაციო სამუშაოებს ადგილზე გაეცნო.
მინისტრის განცხადებით, არსებობს ისეთი ტიპის სტიქიური პროცესები, რომლის პროგნოზირება და პრევენცია მაღალგანვითარებულ ქვეყნებშიც კი ძალიან რთულია და ხშირ შემთხვევებში შეუძლებელიც.
“რაც შეეხება ქვეყანაში მონიტორინგის სისტემების განვითარებას, შესაბამისი სამსახურების გაძლიერებას. ეს წლების წინ დავიწყეთ, ფაქტობრივად. მოშლილი იყო მთელი სისტემა და გვაქვს ძალიან კონკრეტული გეგმები”, – აცხადებს გარემოს დაცვისა და სოფლის მეურნეობის მინისტრი.