ბაღდათის მუნიციპალიტეტის სოფელ ნერგეეთი სამძებრო-სამაშველო სამუშაოები გრძელდება. ღამით ჩამოშლილმა მიწის მასამ 4 სახლი მოიყოლა, ნაპოვნია სამი ადამიანის ცხედარი, ერთი მოქალაქე მაშველებმა გადაარჩინეს, ის საავადმყოფოშია გადაყვანილი.

ეძებენ 6 ადამიანს, მათ შორის არიან არასრულწლოვნებიც. ახლობლების თქმით, ეძებენ მამას და მის სამ შვილს.

“წუხელ ერთი [ადამიანი] ამოიყვანს, ჩემ აქ არ ყოფნაში, ცოცხალი. დანარჩენების ძებნა მიდის. არასრულწლოვნები არიან, ერთი მამა და სამი ბავშვი,15-16 წლამდე”, – ამბობს ადგილობრივი.

ოჯახის ახლობელი, რომლის ნათესავებსაც ასევე ეძებენ “მთვართან” საუბარში ამბობს, რომ ნანგრევებში და მიწის მასაში მოყოლილია კიდევ ერთი ოჯახის რამდენიმე წევრი, მისივე თქმით:

“ორი სახლი არის რომელიც იცით ძირითადად მიწასთან გასწორებული, ერთ სახლში არის ოთხი [ადამიანი] მამა და სამი შვილი, მცირეწლოვანი”.

სტიქიის ადგილებზე იმყოფება 200-ზე მეტი მეხანძრე-მაშველი, ასევე, მობილიზებულია შესაბამისი ტექნიკა, დრონები, კინოლოგთა ჯგუფი.