კეკელიძის ქუჩაზე გამოსახლების საწინააღმდეგო აქციაზე დაკავებული გიორგი ხასაია და აკაკი ჩიქობავა, რომელთა გათავისუფლებასაც ითხოვდნენ სხვადასხვა ადგილებზე მოწყობილი საპროტესტო აქციების დროს, თბილისის საქალაქო სასამართლომ 3000-3000 ლარიანი გირაოს სანაცვლოდ (ბრალდება 5.000 ლარს ითხოვდა) გაათავისუფლა.

„მოცემულ შემთხვევაში ბრალდებულებმა აღიარეს ჩადენილი დანაშაულებრივი ქმედება, ასევე, მათ სრულად აანაზღაურეს მიყენებული ზიანი, შესაბამისად, ბრალდების მხარემ განიხილა, რომ პატიმრობა აღარ წარმოადგენდა აუცილებელ აღკვეთის ღონისძიებას, მიმართა სასამართლოს გირაოს გამოყენების მოთხოვნით.

ბრალდების მხარემ მოითხოვა 5000 ლარიანი გირაო, ხოლო სასამართლომ ნაწილობრივ დააკმაყოფილა და შეუფარდა 3000 ლარი. მიგვაჩნია, რომ გირაოს გამოყენების სტანდარტი არსებობდა, ვინაიდან ის საფრთხეები კვლავ არსებობს, უბრალოდ, აღარ არსებობდა პატიმრობის გამოყენების საფუძველი“, – განაცხადა ლევან ვეფხვაძემ.