უნგრეთის პრემიერი მუქარას ისევ აგრძელებს. ვიქტორ ორბანმა განაცხადა, რომ უკრაინისთვის რუსეთთან საბრძოლველად გამოყოფილმა დახმარებამ ევროკავშირის ბიუჯეტი არ უნდა დააზიანოს. უნგრეთის პრემიერი ევროკავშირს სთავაზობს, უკრაინის დახმარება ბიუჯეტისგან განცალკევებულად მიიღოს, წინააღმდეგ შემთხვევაში პროცესის შეყოვნებით იმუქრება:
“უკრაინის დახმარება თუ გვინდა, რაც ვფიქრობ საჭიროა, ჩვენ ეს უნდა გავაკეთოთ ისე, რომ ევროკავშირის ბიუჯეტი არ დავაზარალოთ, თუმცა 50 მილიარდი ევროს ევროკავშირი ბიუჯეტიდან გაცემა 4 წლის წინსწრებით, არის ევროკავშირის სუვერენიტეტისა და ეროვნული ინტერესების დარღვევა. ჩვენ ისიც კი არ ვიცით, რა მოხდება სამ თვეში. ბრიუსელი თუ ამას მიიღებს, მაშინ უკრაინისთვის დახმარება იქნება ბიუჯეტის გარედან, თუ არა, მე სამწუხაროდ შევაჩერებ ამ პროცესს” ამბობს ორბანი
ორბანის ამ მუქარის პარალელურად, ევროპარლამენტი უნგრეთისთვის ხმის უფლების ჩამორთმევის საკითხს განიხილავს. დეპუტატები შეთანხმდნენ რეზოლუციის პროექტზე. დოკუმენტი მოუწოდებს ევროკავშირის საბჭოს, დაიწყოს უნგრეთისთვის ხმის უფლების ჩამორთმევის პროცესი.
პეტიციისთვის საჭირო რაოდენობის ხელმოწერები უკვე შეგროვდა.
ხმის ჩამორთმევის უფლებას ითვალისწინებს ევროკავშირის შეთანხმების მეშვიდე მუხლი, რომლის თანახმადაც ასეთი ზომა შეიძლება იყოს მიღებული, თუ ქვეყანა სერიოზულად და ხშირად არღვევს ევროკავშირის პრინციპებს. გადაწყვეტილების მიღებას ევროკავშირის ყველა წევრის თანხმობა სჭირდება.