აშშ-ის სენატმა მხარი დაუჭირა თავდაცვის $886-მილიარდიან ბიუჯეტს. პროექტი უკრაინისა და ისრაელისთვის სახსრების გამოყოფასაც ითვალისწინებს. კანონპროექტი კონგრესმენებმა ორპარტიული შეთანხმებით მიიღეს – 87 მომხრე, 13 – წინააღმდეგი.
წინა წელთან შედარებით, 2024 წლის თავდაცვის ბიუჯეტი 3%-ით არის გაზრდილი და აშშ-ს სამხედრო პერსონალის ხელფასების 5.2%-იან ზრდას ითვალისწინებს.
კანონპროექტით, 2024 წლის ფისკალურ წელში უკრაინისთვის 300 მილიონი დოლარის რაოდენობის დახმარება გამოიყოფა და დახმარების ინიციატივა 2026 წლამდე გაგრძელდება.
2024 წლის ბიუჯეტში უკრაინის დახმარების საკითხი არ არის კავშირში იმ 106 მილიარდი დოლარის კანონპროექტთან, რომელსაც ბაიდენი უკრაინისა და ისრაელის დასახმარებლად ითხოვს.
ბიუჯეტის კანონპროექტი ახლა წარმომადგენელთა პალატაში უნდა განიხილონ და სავარაუდოდ მიმდინარე კვირაში უყრიან კენჭს.