საქართველოში ევროკავშირის ელჩს, პაველ ჰერჩინსკის ჟურნალისტებმა ჰკითხეს საარჩევნო ბარიერის გარშემო არსებულ დისკუსიაზე. ოპოზიციის ნაწილი ამბობს, რომ 5%-იანი ბარიერი 2%-ზე უნდა დავიდეს.
ელჩი განმარტავს, რომ საარჩევნო ბარიერი მნიშვნელოვანია, რადგან სიტუაცია, როდესაც მოსახლეობის დიდი ნაწილი ფიქრობს, რომ მათი ხმები არ არის ასახული მომავალ პარლამენტში, შეუსაბამოა.
თუმცა, მისივე თქმით, გადაწყვეტილება საკითხთან დაკავშირებით ქართველებმა უნდა მიიღონ. ჰერჩინსკი ამბობს, რომ არსებობს ოქროს სტანდარტი და რომ ევროკავშირის წევრ ქვეყნებს აღნიშნულთან დაკავშირებით განსხვავებული მიდგომები აქვთ.
რაც შეეხება მომავალ არჩევნებს, ელჩი ხაზს უსვამს, რომ საარჩევნო პერიოდში არ უნდა იყოს ძალადობა და მნიშვნელოვანი ცვლილებები არჩევნებამდე ცოტა ხნით ადრე არ უნდა იყოს მიღებული.
“ევროკომისიის მიერ ახლად განსაზღვრული მეოთხე ნაბიჯი ეხება თავისუფალ და სამართლიან არჩევნებს. ეს უნდა გადაწყვიტონ ქართველებმა ერთობლივად, როგორ განახორციელონ საარჩევნო კამპანიის ორგანიზება. ჩვენ გულწრფელად ვიმედოვნებთ, რომ იქნება თანაბარი პირობები, რომ ყველას ექნება შესაძლებლობა მონაწილეობა მიიღონ საარჩევნო კამპანიაში, რომ რაც უმთავრესია, არ იქნება ძალადობა. საარჩევნო პერიოდში ძალადობა აბსოლუტურად მიუღებელია ნებისმიერ დემოკრატიულ ქვეყანაში. და რა თქმა უნდა, ჩვენ არ გვინდა, მოხდეს მნიშვნელოვანი ცვლილებების შეტანა წესებში არჩევნებამდე ცოტა ხნით ადრე. ასე რომ, რაც უფრო მალე მოხდება შეთანხმება ყველა ტექნიკურ საკითხზე, მით უკეთესი იქნება, რათა უზრუნველყოფილი იყოს, რომ ყველა იყოს კარგად მომზადებული და მიიღოს მონაწილეობა საარჩევნო კამპანიაში.
თქვენ ბარიერის შესახებ მკითხეთ, ეს იყო შარლ მიშელის შუამავლობით ორი წლის წინ მიღწეული შეთანხმების ნაწილი. გადაწყვეტილება უნდა მიიღონ ქართველებმა. ჩვენი თვალსაზრისით, არჩევნებს აქვს აზრი მაშინ, თუკი ხალხი გრძნობს, რომ მათი ხმა გაგებულია. ასე რომ საარჩევნო ბარიერი მნიშვნელოვანია, რადგან სიტუაცია, როდესაც მოსახლეობის დიდი ნაწილი ფიქრობს, რომ მათი ხმები არ არის ასახული მომავალ პარლამენტში, არის შეუსაბამო. თუმცა მეორე მხრივ სიტუაცია, როდესაც გყავს ბევრი პარტია წარმოდგენილი და ძალიან რთულია წინსვლა, რადგან ზედმეტად ბევრი მრავალფეროვნებაა, ასევე არ არის სათანადო. ეს დისკუსია გაგრძელდება და მე გულწრფელად ვიმედოვნებ, რომ ქართველები თავად შეთანხმდებიან ერთმანეთში ისეთ სიტუაციაზე, რომელშიც სათანადო ბალანსი იქნება უზრუნველყოფილი”, – ამბობს ჰერჩინსკი.
ცნობისთვის, “ქართული ოცნება” აცხადებს, რომ საარჩევნო ბარიერის დაწევის საკითხი არ განიხილება.