ბავშვთა ქორწინების წინააღმდეგ – “ქალთა მოძრაობა”, “საფარი” და აქტივისტები აზერბაიჯანული თემიდან 25 ნოემბერს, 15:00 საათზე თბილისში, პირველი რესპუბლიკის მოედანზე მარშს გამართავენ. ორგანიზატორები წერენ, რომ ბავშვთა ქორწინების არსებობა სახელმწიფოს პასუხისმგებლობაა და რომ სახელმწიფო არ იცავს ბავშვებს.
“საქართველოში მხოლოდ სრულწლოვანებს აქვთ ქორწინების უფლება, მიუხედავად ამისა, ჩვენ გვესმის შემზარავი ამბები ბავშვთა ქორწინებისა, იძულებითი ნიშნობისა და ქორწინებისა, 16 წლამდე გოგოების მშობიარობისა და ბოლოს 14 წლის აითაჯის მკვლელობისა “ქმრისგან“.
სახელმწიფო არ იცავს ბავშვებს.
ბავშვთა ქორწინების არსებობა სახელმწიფოს პასუხისმგებლობაა.
სახელმწიფო არ ებრძვის პედოფილიას!
ჩვენ, ყველამ ერთად, ვისაც ამ სასტიკი რეალობის ცვლილება გვსურს, ახლავე უნდა გადავდგათ ქმედითი ნაბიჯები და სახელმწიფოს მკაცრად მოვთხოვოთ ეფექტური რეაგირება.
ბავშვები თავს ვერ დაიცავენ, ბავშვები ჩვენ უნდა დავიცვათ!
25 ნოემბერს, ქალთა მოძრაობა, აქტივისტები აზერბაიჯანული თემიდან და ექსპერტები საპროტესტო მარშზე გელოდებით! გელით ყველას, ვისთვისაც ბავშვები, მათი ცხოვრება, განვითარება და ბედნიერება მნიშვნელოვანია”, – წერენ ორგანიზატორები.