დროებით ოკუპირებული აფხაზეთის ე.წ. საგარეო საქმეთა მინისტრი აცხადებს, რომ მიმდინარეობს “დიალოგი” რუსეთში პალესტინის სპეციალურ წარმომადგენელთან და რუსეთში პალესტინის საგანგებო და სრულუფლებიან ელჩთან. ინალ არძინბას თქმით “დიალოგი”, სხვა საკითხებთან ერთად, “დიპლომატიური ურთიერთობების” დამყარების პერსპექტივებსაც ეხება.
განცხადებას ამის შესახებ ე.წ. საგარეო საქმეთა სამინისტრო ავრცელებს. “უწყების” ინფორმაციით, ე.წ. საგარეო საქმეთა სამინისტროსთან არსებული “საზოგადოებრივი საბჭოს” სხდომაზე განხილული იყო არაბთა გაერთიანებულ საამიროებთან, ავღანეთთან, იემენთან და ლიბანთან ურთიერთობების განვითარებაც.
არძინბამ ილაპარაკა ბელარუსში გამართულ “ვიზიტზეც” და თქვა, რომ “აფხაზეთის დელეგაციის ვიზიტი მინსკში ქართველი დიპლომატების მძაფრი წინააღმდეგობის მიუხედავად შედგა” მისივე თქმით, “ბელარუსის რესპუბლიკასა და საქართველოს შორის დიპლომატიური ურთიერთობები დაღმავალ ტრაექტორიაზეა”.
არძინბამ განაცხადა, რომ მიმდინარეობს “სამინისტროების უწყებათაშორისი დიალოგი” სხვადასხვა მიმართულებით.