კენიიდან ფოთის პორტში ჩამოტანილი ბაობაბის სამი ხე ღამით დენდროლოგიურ პარკში გადაიტანეს. ერთ კვირაში ეს უკვე მეორე შემთხვევაა, როდესაც ხეები გადააქვთ. როგორც ცნობილია, “ქართული ოცნების” დამფუძნებელმა, ბიძინა ივანიშვილმა სულ 8 ხე ჩამოიტანა.
ხეების ტრანსპორტირებაში ამჯერადაც სახელმწიფო სტრუქტურები იყვნენ ჩართულები. ხეებს ფოთიდან შეკვეთილში პოლიციის რამდენიმე ეკიპაჟი მიაცილებდა. ჩაკეტილი იყო სამტრედია-ბათუმის მაგისტრალი, ასევე ფოთიდან შეკვეთილამდე მიმავალი ცენტრალური გზა. რამდენიმე ადგილზე გაჩერებულები იყვნენ მგზავრები, მათ საპატრულო პოლიცია აფრთხილებდა, რომ მედიასთან კომენტარი არ გაეკეთებინათ.
გზის ნაწილზე ჩაჭრეს ელექტროსადენები, მოხსნეს საგზაო ნიშნები, გზის განაპირად ხეებს მოაჭრეს ტოტები. უცნობია მათ აღსადგენად ფული ბიუჯეტიდან დაიხარჯება, თუ ბიძინა ივანიშვილი გადაიხდის. პროცესში პოლიციასთან ერთად ჩართული იყო მერიის კეთილმოწყობის სამსახურები, საგანგებო-სამაშველო ოპერაციების დეპარტამენტის თანამშრომლები.
მოძრაობა ამ დროისთვის აღდგენილია.