ისრაელის სახმელეთო, საჰაერო და საზღვაო ძალებმა იერიში მიიტანეს რაკეტების გამშვებ მოწყობილობებზე, ღაზის სექტორის საზღვართან მდებარე გვირაბების შესასვლელ-გამოსასვლელებსა და ჰამასის ოპერატიული მეთაურობის პუნქტებზე, – ამის შესახებ 31 ოქტომბერს ცაჰალის პრესსამსახურმა განაცხადა.
სახმელეთო რეიდის დროს ცაჰალი ბრძოლაში ჩაება ჰამასის ტერორისტებთან და მათ ტყვიამფრქვევებისა და სარაკეტო ცეცხლი გაუხსნა. პრესსამსახური იტყობინება ლიკვიდირებული ტერორისტების შესახებ, თუმცა, არ აზუსტებს, არის თუ არა დანაკარგი ცაჰალის მებრძოლებს შორის.
ამავდროულად, ჰამასის წარმომადგენლებმა, თავიანთი მხრიდან, ასევე გაავრცელეს ინფორმაცია ცაჰალთან შეტაკების შესახებ და, მათი თქმით, ისრაელელ ჯარისკაცებს ცეცხლი ტანკსაწინააღმდეგო რაკეტებით გაუხსნეს. ტერორისტული ორგანიზაცია ასევე, იუწყება, რომ ღაზის ჩრდილო-დასავლეთით, რაკეტებით დააზიანეს ორი ტანკი და ბულდოზერი. თავიანთი მხრიდან დანაკარგის შესახებ არც ჰამასის განცხადებაშია აღნიშნული.
ცაჰალის პრესსამსახურის განცხადებით, 31 ოქტომბრის ღამით მიტანილი იერიშების შედეგად, ჰამასის “ბეით-ლაჰიის” ბატალიონის მეთაური აბუ აჯინი ლიკვიდირებულია, რომელიც კიბუც ერეზზე თავდასხმას ხელმძღვანელობდა. ცაჰალისვე ცნობით, აბუ აჯინი მონაწილეობდა ჰამასის მიერ დრონებითა და პარაპლანებით თავდასხმის სტრატეგიული გეგმის შედგენაში.