ომის მე-18 დღე: სად რა ხდება ისრაელში

სამშაბათ დილიდან, ომის მე-18 დღეს, ღაზის სექტორიდან ისრაელის მიმართულებით სარაკეტო შეტევები განახლდა. საჰაერო განგაშის სირენებია ჩართული ღაზის სექტორის მოსაზღვრე რეგიონებში. 

“ცაჰალის” პრესსამსახური აცხადებს, რომ ბოლო 24 საათის განმავლობაში ისრაელის თავდაცვის ძალებმა “ჰამასისა” და “ჰეზბოლას” პოზიციებზე, ასევე სამხედრო დანიშნულების ინფრასტრუქტურაზე 400-ზე მეტი საჰაერო დარტყმა განახორციელეს. 

როგორც პრესსამსახური იტყობინება, ძირითადად, სამიზნე იყო მეჩეთები, რომლებსაც ბოევიკები იარაღის საწყობად იყენებენ და, ამას გარდა, მეჩეთების ქვეშ გაყვანილი გვირაბებით დაჯგუფებები ერთმანეთს უკავშირდებიან. 

“ცაჰალის” ცნობით, დარტყმა განხორციელდა ასევე ოპერატიულ გვირაბზე, რომელიც ჰამასის ტერორისტებს ზღვის ნაპირზე სწრაფად გასვლის საშუალებას აძლევდა. 

ისრაელში, სოლიდარობის ვიზიტით საფრანგეთის პრეზიდენტი ემანუელ მაკრონი ჩავიდა. თავდაპირველად ასეთი ვიზიტი ჯო ბაიდენმა განახორციელა. სოლიდარობის ვიზიტით ისრაელში ჩასვლის სურვილი ვოლოდიმირ ზელენსკიმაც გამოთქვა. 

ტყვეობის შემდეგ, წუხელ, გვიან ღამით, საკუთარ ოჯახებს დაუბრუნდნენ 79 წლის ნურიტ კუპერი და 85 წლის იოჰევედ ლიფშიცი – ისინი კიბუც ნირ ოზიდან არიან. პარალელურად, “ჰამასის” ტყვეობაში ამ დრომდე რჩებიან 85 წლის ამირამი (ნურიტ კუპერის ქმარი) და 83 წლის ოდედი – იოჰევედის ქმარი. ორი დღის წინ ჰამასმა ტყვეობიდან ამერიკელი დედა-შვილიც გაათავისუფლა.