სოლიდარობა ირაკლი ბებუას! – ამ სახელწოდებით აქცია 24 ოქტომბერს თბილისის პარალელურად ზუგდიდშიც გაიმართება. ინფორმაციას სოციალურ ქსელში სამოქალაქო სოლიდარობის ფონდი ავრცელებს. აქცია 16:00 საათზე სკეიტ-პარკის ტერიტორიაზე ჩატარდება.

საქართველოს მოქალაქე – ირაკლი ბებუა აფხაზეთის სეპარატისტული რეჟიმის ტყვეობაშია.
2020 წელს, როდესაც გალში სეპარატისტები „დამუკიდებლობის დღეს“ აღნიშნავდნენ, ირაკლიმ დე-ფაქტო რესპუბლიკის სიმბოლიკა დაწვა. მას ბრალი წაუყენეს სამი მუხლით: სახელმწიფო სიმბოლიკის შეურაცხყოფისთვის, სხვისი ქონების განზრახ განადგურებისთვის ან დაზიანებისთვის და საბრძოლო მასალის უკანონო შენახვისთვის და 9 წლით თავისუფლების აღკვეთა მიუსაჯეს.

ე.წ. გამარჯვების ოცდაათ წლისთავთან დაკავშირებით, აფხაზეთის დე ფაქტო პარლამენტმა ამნისტია გამოაცხადა, თუმცა ის ბებუას არ შეხებია. სამი წლის მანძილზე სახელმწიფომ ვერ გადადგა ქმედითი ნაბიჯები ირაკლის ტყვეობიდან დახსნისთვის.

ამ სამი წლის მანძილზე ირაკლის ჯანმრთელობის მდგომარეობა გაუარესდა.

24 სექტემბერს, თბილისში “აფხაზური ამბების” მიერ დაგეგმილი სოლიდარობის აქციის პარალელურად, მოდი ზუგდიდში, 16:00 საათზე, სკეიტ-პარკის ტერიტორიაზე. ერთად გამოვუცხადოთ სოლიდარობა ირაკლი ბებუას და შევახსენოთ ხელისუფლებას, რომ მისი ვალდებულებაა ყველა სამართლებრივი გზის გამოყენება თავისი მოქალაქის საქართველოს კონტროლირებად ტერიტორიაზე უსაფრთხოდ დასაბრუნებლად!, – წერენ აქცის ორგანიზატორები.

შეგახსენებთ, რომ ბებუა 2020 წლის 30 სექტემბერს დააკავეს და ამავე წლის 8 დეკემბერს ე.წ.სასამართლომ 9 წლით თავისუფლების აღკვეთა მიუსაჯა