ქართული წარმოშობის ებრაელი გოგო თამარ გოლდბერგი, რომელიც 7 ოქტომბერს რეიმის საერთაშორისო მუსიკალურ ფესტივალზე იმყოფებოდა და ოჯახი და ახლობლები მას შემდეგ ეძებდნენ, მოკლული იპოვეს.
თამარ გოლდბერგთან ბოლო კავშირი ოჯახის წევრებმა 7 ოქტომბერს დაამყარეს, მას შემდეგ მასზე არავინ არაფერი იცოდა, მხოლოდ ის იყო ცნობილი დაახლოებით, რტომელი ლოკაცია აღნიშნა ბოლოს მისმა ტელეფონმა.
ორკვირიანმა ძებნამ და იმედმა, რომ შესაძლოა, თამარ გოლდბერგი გადარჩა ან ტყვედ იყო აყვანილი, ამაოდ ჩაიარა:
” 14 დღის შემდეგ ღმერთმა ასევე წაგვართვა ბოლო იმედი და გავიგეთ რომ ჩემი თამი, 7 ოქტომბრის სისხლიან დღეს მოკლეს. მისი სხეული სრულად ვერც ვნახეთ. მე შენ არასოდეს დაგივიწყებ. დაკრძალვა კვირას, რიშონ ლეციონში გაიმართება,” – წერს ფეისბუკზე თამარის და მარი ლაბატონი.
თამარ გოლდბერგის გარდა, ისრაელზე “ჰამასის” თავდასხმას კიდევ მინიმუმ ორი ქართველი ებრაელი ემსხვერპლა. 26 წლის მაიორი ავი აბრაამ ქუბელაშვილი და პოლიციელი ისააკ ბაზუკაშვილი ტერორისტებმა სამსახურეობრივი მოვალეობის შესრულების დროს მოკლეს, დაღუპულთა შორისაა ავი ჰობელაშვილიც.