ბრიუსელის ცენტრში, მოტოციკლით მოძრავმა პირმა გამვლელებს ცეცხლი გაუხსნა, შემდეგ კი სავაჭრო ცენტრის შენობაშიც სროლა-სროლით შეჰყვა. ტერორისტმა ორი უდანაშაულო ადამიანი მოკლა. დაღუპულია შვედეთის ორი მოქალაქე, სავარაუდოდ, ბელგია-შვედეთის მატჩზე დასასწრებად ჩასული პირები. მკვლელობა “ეიზელის” სტადიონიდან დაახლოებით 5 კილომეტრში მოხდა.
კადრები, სადაც ჩანს, როგორ ესვრის ტერორისტი ორ მოქალაქეს, ჩვენს ტელეგრამ არხზეა გამოქვეყნებული (გაფრთხილება: ვიდეო შეიცავს ძალადობის სცენებს!).
პირი, რომელმაც ბრიუსელში ორი მოქალაქე მოკლა, პოლიციამ დილით კაფეში იპოვა, მას იარაღი თან ჰქონდა. 45 წლის აბდუსალემ ლასუედმა პოლიციას წინააღმდეგობა გაუწია და ცეცხლი გაუხსნა, საპასუხო ცეცხლის შედეგად კი ის ადგილზე მოკლეს.
პოლიცია ტერორისტს მთელი ღამის განმავლობაში ეძებდა. სტადიონთან ახლოს მომხდარი ტერაქტის გამო, ბელგია-შვედეთის მატჩიც შეწყდა – მეორე ტაიმში ფეხბურთელები სათამაშოდ არ გამოსულან.
სტადიონზე მისულ მაყურებლებს მოუწოდებდნენ, ტრიბუნებზე დარჩენილიყვნენ და ქუჩაში ჯგუფურად გადაადგილება თავიდან აერიდებინათ, რადგან ქალაქში შეიარაღებული ტერორისტი გადაადგილდებოდა.
აღსანიშნავია, რომ ტერაქრტი ბრიუსელში ძალოვანთა “განსაკუთრებული მობილიზაციის” ფონზე მოხდა.