ჩხოროწყუს მუნიციპალიტეტის სოფელ კირცხის საჯარო სკოლაში, სამეურვეო საბჭომ დირექტორი ვერ აირჩია. განათლების სამინისტროს მიერ წარდგენილმა კანდიდატმა, ბელა კვირტიამ 8 კაციანი საბჭოდან სამი მხარდაჭერა მიიღო, სამი წინააღმდეგი იყო, ხოლო ერთი ბიულეტენი ბათილად ცნეს, რადგან საბჭოს წევრი საზღვარგარეთ იმყოფება.
კირცხის სკოლის ყოფილი დირექტორია დიმონ არახამია, რომელსაც დირექტორობაზე სხვა სკოლაში ჰქონდა განაცხადი წარდგენილი, თუმცა საბჭომ ის არსად არ აირჩია. არახამია ამ ყველაფრის მიზეზად პოლიტიკურ ინტერესებს ასახელებს. ის ზეწოლაზე საუბრობს და ამბობს, რომ “ქართული ოცნება” საარჩევნოდ მისგან მშობლებსა და პედაგოგებში აგიტაციის ჩატარებასა და ხმების მოგროვებას ითხოვს, რაზეც თავად უარს ამბობს. არახამიას თქმით, მისი თანამდებობაც ამან შეიწირა.