უკრაინის პრეზიდენტმა, ვოლოდიმირ ზელენსკიმ ესპანეთის პრემიერ-მინისტრ პედრო სანჩესთან და გერმანიის კანცლერ ოლაფ შოლცთან შეხვედრისას განაცხადა, რომ ის ორიენტირებულია უკრაინის საჰაერო თავდაცვის საჭიროებაზე და ფიქრობს, რომ საჭირო მხარდაჭერისთვის მნიშვნელოვან პროგრესს მიაღწიეს.
ზელენსკის თქმით, უკრაინა ესპანეთიდან ექვს საზენიტო-სარაკეტო სისტემა Hawk-ს გადასცემს, გერმანია კი კიევისთვის Patriot-ის კიდევ ერთი სისტემის მიწოდებაზე იმუშავებს.
უკრაინის პრეზიდენტის განმარტებით, მიაჩნია, რომ პატრიოტის სისტემა არის ერთადერთი სისტემა, რომელსაც შეუძლია ისეთი საფრთხეებისა და ხოცვა-ჟლეტის თავიდან აცილება, როგორიც გუშინ ხარკოვის ოლქის სოფელ გროზაში განხორციელდა და რასაც 51 ადამიანის სიცოცხლე ემსხვერპლა.
ზელენსკიმ კიდევ ერთხელ გაუსვა ხაზი, რომ მშვიდობიანი მოსახლეობის დასაცავად აუცილებელია უკრაინის საჰაერო თავდაცვის გაძლიერება.
„მიმაჩნია, რომ დღეს, საჰაერო თავდაცვის გარეშე, შეუძლებელია ადამიანების დაცვა, განსაკუთრებით ზამთარში, ადამიანების დაცვა, რომლებიც აბსოლუტურად ტრაგიკულად დაიღუპნენ ამ არაადამიანური ტერორისტული თავდასხმის გამო“, – განაცხადა ზელენსკიმ.
მისი თქმით, რუსეთი ყოველდღიურად უტევს ხარკოვის ოლქს და მხოლოდ საჰაერო თავდაცვას შეუძლია უკრაინას დახმარება გაუწიოს.