“06:10, არ ვემორჩილებით “ქართული ოცნების” მიერ მიღებულ ახალ რუსულ კანონს”, – ამის შესახებ ახალგაზრდული ორგანიზაცია “ნაბიჯი” სოციალურ ქსელში წერს და პარლამენტის მიმდებარე ტერიტორიიდან ფოტოს აქვეყნებს.
აქტივისტებმა “ქართული ოცნების” მიერ დაჩქარებული წესით მიღებული ახალი რუსული კანონის გასაპროტესტებლად ღამე პარლამენტთან გაათენეს. ადგილზე მათ დემონსტრაციულად გაშალეს კარვები, რაც ერთ-ერთია, რასაც ახალი კანონი აკრძალავს.
აქციის მონაწილეების თქმით, “ქართულ ოცნებას” არ გამოუვა საკუთარ მოსახლეობასთან რუსული მეთოდებით ბრძოლა.
შეგახსენებთ, რომ “შეკრებებისა და მანიფესტაციების შესახებ” კანონით მნიშვნელოვნად იზღუდება გამოხატვისა და შეკრების თავისუფლება და დემონსტრანტებისთვის მთელ რიგ აკრძალვებს აწესებს.
დოკუმენტის თანახმად, შეკრების ან მანიფესტაციის მონაწილეებს ეკრძალებათ მოაწყონ დროებითი კონსტრუქცია, თუ მისი მოწყობა საფრთხეს უქმნის შეკრების ან მანიფესტაციის მონაწილეებს ან სხვა პირებს, ხელს უშლის პოლიციის მიერ საზოგადოებრივი წესრიგისა და უსაფრთხოების დაცვას, იწვევს საწარმოს, დაწესებულების ან ორგანიზაციის ნორმალური ფუნქციონირების შეფერხებას და შეკრების ან მანიფესტაციის ჩატარებას არ უკავშირდება.
კანონპროექტს “ოცნება” დაჩქარებული წესით განიხილავს და მოტივად სუს-ის 18 სექტემბრის განცხადებას ასახელებს, თითქოს ქვეყანაში ოქტომბერ-დეკემბერში “არეულობა და დესტაბილიზაცია იგეგმება”.