ჩხოროწყუს სამ სკოლაში დირექცია გაიფიცა და სასწავლო პროცესი შეწყვეტილია – ცნობილი ხდება, რომ ეს გადაწყვეტილება მათ მას შემდეგ მიიღეს, რაც სასწავლო დაწესებულებების დირექტორებთან ხელშეკრულებები აღარ გაგრძელდა.
სასწავლო პროცესი არ მიმდინარეობს და გაფიცული არიან ჩხოროწყუს რაიონის სოფლების სკოლები: ჩხოროწყუს მეორე საჯარო სკოლა, სოფელ კირცხის პირველი საჯარო სკოლა და ახუთის პირველი საჯარო სკოლა.
“გაფიცვის მიზეზი არის, რომ ახუთის პირველი საჯარო სკოლის მოქმედი დირექტორი არ წარადგინეს. ამ ადამიანს ჰქონდა დირექტორის სტატუსი და რაიონში ყველაზე წარმატებული და მოწესრიგებული დირექტორის წარდგენა იმის გამო არ მოხდა, რომ სკოლის ხელმძღვანელი ოპოზიციური პარტიის წევრი იყო, პოლიტიკური ნიშნით არ წარადგინეს. სასწავლო პროცესი არ მიმდინარეობს, უშუალოდ ბავშვები არიან ამ უსამართლობის წინააღმდეგ გამოსული და მათ უერთდებიან მასწავლებლები და ამ სკოლების დირექტორები”, – ამბობს ქართული ენისა და ლიტერატურის მენტორი მასწავლებელი მანანა მიქავა.
სკოლების პედაგოგები და მოსწავლეები დირექტორად იმ ადამიანების დატოვებას ითხოვენ, ვინც ამ პოზიციას აქამდე იკავებდა.
ჯერჯერობით რესურსცენტრს განცხადება არ გაუკეთებია და სკოლებში მათი წარმომადგენლები არ მისულან.განათლებისა და მეცნიერების სამინისტრომ დირექტორთა წარდგენის პროცესი, მათი სერტიფიცირების შემდეგ, ოქტომბერში უნდა დაასრულოს. სამინისტრომ 5 ოქტომბერს მსურველ პირებს მოუწოდა, საკუთარი თავები სიაში გადაამოწმონ, დღეს კი ირკვევა, რომ სკოლების უმეტესობაში მხოლოდ ერთი კანდიდატია წარდგენილი, რაც სკოლების სამეურვეო საბჭოებისთვის არჩევანს ამცირებს.