ოჩამჩირის პორტი სრულიად არის მზად იქ რუსეთის სამხედრო-საზღვაო ძალების მუდმივი ბაზის განსათავსებლად, – ამის შესახებ “რია ნოვოსტის’ ოჩამჩირის აფხაზურ ადმინისტრაციაში განუცხადეს.
შეგახსენებთ, დროებით ოკუპირებული აფხაზეთის დე ფაქტო პრეზიდენტმა ასლან ბჟანიამ განაცხადა, რომ შეთანხმება ოჩამჩირეში მუდმივი ბაზის განთავსებაზე უკვე ხელმოწერილია.
თავის მხრივ, დიმიტრი პესკოვმა ამასთან დაკავშირებით დასმულ შეკითხვაზე კომენტარი არ გააკეთა და აღნიშნა, რომ ფლოტისა და ფლოტში შემავალი გემების ლოკაციის შესახებ შეკითხვებზე პასუხის გაცემა თავდაცვის სამინისტროს კომპეტენციაა.
სერგეი შამბამ კი ამავე საკითხზე საუბრისას აღნიშნა, რომ ოჩამჩირეში რუსული სამხედრო ხომალდების ყოფნა “აფხაზეთის უსაფრთხოების გარანტიაა”.
ოჩამჩირის პორტი მდინარე ჯუკმურის შესართავთან მდებარეობს და ზღვასთან არხითაა შეერთებული. პორტის აკვატორია დაკავშირებულია აფხაზეთის სარკინიგზო ქსელთან და საგზაო ინფრასტრუქტურასთან. პორტს სამი ნავსადგური აქვს: ორი სატვირთო და ერთი – ნავსადგომი.
პორტის შიგნით ხელმისაწვდომია მობილური მექანიზაცია, არის სხვადასხვაგვარი აღჭურვილობა, სატვირთო ავტოტრანსპორტის ჩათვლით, ასევე პორტალური და კოშკურა-ამწეები, ავტოამწეები და ტელესკოპური კონვეეირული ლენტა. ოჩამჩირეში სამხედრო დანიშნულების პორტი სსრ კავშირის დროსაც მოქმედებდა, თუმცა, ის მცირეგაბარიტიანი მცურავი საშუალებებისთვის იყო განკუთვნილი.
