“ქართული ოცნების” დეპუტატმა, მამუკა მდინარაძემ მედიას მიაწოდა ინფორმაცია, რომ ამერიკის მიერ სანქცირებული ოთარ ფარცხალაძე გამოკითხეს. დეპუტატმა ჟურნალისტებს ეს ინფორმაცია ინტერვიუს დასრულების შემდეგ მიაწოდა.
მდინარაძემ თქვა, რომ ფარცხალაძე გამოძიების დაწყების დღესვე დაიბარეს და სახელმწიფო უსაფრთხოების სამსახურში გამოცხადდა.
მანამდე მდინარაძე ამბობდა, რომ გაუგებარი იყო რის საფუძველზე უნდა დაებარებინათ ფარცხალაძე გამოკითხვაზე, როცა მტკიცებულებები არ არსებობდა.
“მე მხოლოდ ვარაუდი შემიძლია გამოვთქვა, თქვენ თუ შეგიძლიათ გამახსენოთ მტკიცებულება რა იყო მის ბრალდებასთან დამადასტურებელი და აუცილებლად ავდგები და მეც ვიკითხავ, როგორც პარლამენტის წევრი, ჩემი უფლებამოსილების ფარგლებში იმ მტკიცებულებასთან დაკავშირებით რატომ არ იბარებენ, თუ არაფერია და ცარიელი ფურცელია, კითხვაც კი რა უნდა დაუსვან შეიძლება ამაზეც პოზიცია არ არსებობდეს საგამოძიებო უწყებაში, ეს მხოლოდ ვარაუდია”, – ამბობდა მდინარაძე მანამდე.
19 სექტემბერს პროკურატურამ განაცხადა, რომ ყოფილი გენერალური პროკურორის, ოთარ ფარცხალაძის საქმეზე გამოძიება სახელმწიფო უსაფრთხოების სამსახურში მიმდინარეობს. მუხლი დაკონკრეტებული არ ყოფილა.
14 სექტემბერს, აშშ-ის ხაზინის დეპარტამენტმა საქართველოს ყოფილი მთავარი პროკურორი ოთარ ფარცხალაძე დაასანქცირა. ლილუაშვილის უწყებამ განცხადება 15 სექტემბერს გაავრცელა, სადაც ნათქვამი იყო, რომ ოთარ ფარცხალაძესთან დაკავშირებით მიმდინარეობდა საკითხის შესწავლა. ამის შემდეგ უსაფრთხოების სამსახურს საკითხზე ოფიციალური კომენტარი, ან განცხადება აღარ გაუვრცელებია.