ბოლო ორი კვირის განმავლობაში, დროებით ოკუპირებულ მარიუპოლში, უცნაურ ვითარებაში, 11 რუსი ოკუპანტი სამხედრო მოკვდა.
მიზეზი ყველა შემთხვევაში, გულის უეცარი შეტევა გახდა, რასაც მყისიერი სიკვდილი მოჰყვა. გაკვეთამ აჩვენა, რომ მხოლოდ სამს ჰქონდა გულთან დაკავშირებული პრობლემები, მათგან სერიოზული გართულება კი – მხოლოდ ერთს.
უეცარი და უცნაური სიკვდილის ფაქტს რუსული ტელეგრამ-არხები ადასტურებენ, ხოლო მედია არ გამორიცხავს, რომ რუსი სამხედრო მოსამსახურეები მოწამლეს.
შესაძლოა, მათ სიკვდილში გარეული იყვნენ ან დივერსანტები, ან ადგილობრივი პარტიზანები, რომლებიც მარიუპოლსა და მელიტოპოლში აქტიურად და შეუმჩნევლად მოქმედებენ.
მოწამლვის მიზეზი, შესაძლოა, ალკოჰოლი ან საკვები იყოს, სადაც დივერსანტები ძლიერმოქმედ შხამს ურევენ.
ერთ-ერთი ვერსიით, შხამი იწვევს გულის გაჩერებას, ხოლო მისი კვალის აღმოჩენა შეუძლებელი ხდება ორგანიზმში მოხვედრიდან სულ რამდენიმე საათის შემდეგ.
რუსი ექსპერტები დასამხედრო მიმომხილველები მარიუპოლში მყოფ სამხედროებს მოუწოდებენ, თავი შეიკავონ ალკოჰოლის მიღებისგან და არ ჭამონ საჭმელი “გადაუმოწმებელ ადგილებში”. ამასთან, მედიაში ისიც გაიხსენეს, რომ ამგვარი გაფრთხილება წინათაც გავრცელდა, მაგრამ როგორც ჩანს, ბევრმა რუსმა სამხედრომ მას ყურადღება არ მიაქცია.