აშშ-ის მიერ სანქცირებულმა და “ქართველ-რუს ოლიგარქად” მოხსენიებულმა ყოფილმა მთავარმა პროკურორმა ოთარ ფარცხალაძემ “რუსთავი-2”-ს წერილობით უპასუხა და კომენტარი მისწერა მის დასანქცირებასთან დაკავშირებით.
ოთარ ფარცხალაძე წერს, რომ სანქციები კონკრეტული ადამიანების ინსპირირებულია და რომ აქტიურად ცდილობენ მისი სახელის დაკავშირებას სახელმწიფო ინსტიტუტებთან ან ხელისუფლებასთან, რისთვისაც, მისივე თქმით, არანაირი საფუძველი არ არსებობს:
“ქათულმა საზოგადოებამ კარგად იცის, რომ უკვე 10 წელია, არათუ საჯარო სამსახურში თანამდებობას არ ვიკავებ, არამედ სახელმწიფო ინსტიტუტებთან არანაირი კავშირი არ მაქვს! მიუხედავად ამისა, ნაციონალურ მოძრაობასა და მის პროპაგანდისტულ მედიას, ჩემ წინააღდეგ ტალახის სროლა და მიზანმიმართული დისკრედიტაციის მცდელობები, მთელი ამ დროის განმავლობაში ერთი წამითაც არ შეუწყვიტავს. […]
ჩემ წინააღმდეგ დაწესებული სანქციები კონკრეტული ადამიანების ინსპირირებულია და ამ ათწლიანი დისკრედიტაციის კამპანიის დაგვირგვინებაა. მეორე მხრივ, ადგილობრივ დონეზე კონკრეტული პოლიტიკური ინტერესების მქონე სუბიექტების რეაქციებმა დამარწმუნა, რომ აქტიურად ცდილობენ ჩემი სახელის სახელმწიფო ინსტიტუტებთან ან ხელისუფლებასთან დაკავშირებას, რასაც, კიდევ ერთხელ ხაზგასმით ვაცხადებ, არანაირი საფუძველი არ აქვს, ხოლო რას ემსახურება აღნიშნული მცდელობები, დარწმუნებული ვარ, ქართული საზოგადოება ყველაზე უკეთ ხვდება”, – წერს ფარცხალაძე “რუსთავი 2”-ს.