საქართველოს მთავრობის სტრატეგიული კომუნიკაციების დეპარტამენტის უფროსი ნინო გიორგობიანი წერს, რომ აგვისტოს თვეში საქართველოს პრემიერმინისტრის აშშ-ში კერძო ვიზიტით ყოფნისას, მგზავრობისა და სხვა ხარჯები სახელმწიფო ბიუჯეტიდან არ გაწეულა.
მისი თქმით, პრემიერი ყოველწლიურად ავსებს ქონებრივ დეკლარაციას და წელსაც, ეს და სხვა ხარჯები შეტანილი იქნება მის დეკლარაციაში.
“კონკრეტული მედიასაშუალებები ცდილობენ სკანდალის აგორებას იმასთან დაკავშირებით, რომ აგვისტოს თვეში პრემიერ-მინისტრი ირაკლი ღარიბაშვილი აშშ-ში გაემგზავრა საკუთარ შვილთან ერთად, რომელსაც პენსილვანიის უნივერსიტეტში სასწავლო წელი ეწყებოდა.
ახალ სკანდალს ეძებენ, თუმცა ისევე როგორც სხვა შემთხვევებში, აქაც სკანდალური არაფერია. ყველა ადამიანს აქვს სურვილი და უფლებაც მისი შვილისთვის ასეთ მნიშვნელოვან დროს მის გვერდით იყოს. მით უმეტეს არც კანონი დარღვეულა და არც სახელმწიფო ხარჯები გაწეულა.
მიმდინარე წლის აგვისტოს თვეში პრემიერ-მინისტრი კერძო ვიზიტით აშშ-ში იმყოფებოდა და მისი მგზავრობის, ასევე ჩარტერული (კომერციული) რეისის თუ ნებისმიერი სხვა ხარჯი სახელმწიფო ბიუჯეტიდან არ გაწეულა.
პრემიერ-მინისტრი ყოველწლიურად ავსებს ქონებრივ დეკლარაციას, სადაც ასახულია ყველა გაწეული ხარჯი, შესაბამისად, დაელოდეთ შემდეგი დეკლარაციის გამოქვეყნებას”, – წერს ნინო გიორგობიანი “ფეისბუქზე”.
შეგახსენებთ, საქართველოს პრემიერმინისტრის ირაკლი ღარიბაშვილის ფოტოები, რომლებიც მას აშშ-ში ყოფნისას, სავარაუდოდ, იქ მყოფმა ქართველებმა გადაუღეს, რამდენიმე მედიასაშუალებამ გამოაქვეყნა.