მოსკოვის თავზე ამოუცნობი, მტრულად განწყობილი უპილოტო საფრენი აპარატების გამოჩენის გამო, 5 სექტემბერს, გამთენიისას, მოსკოვის სამ აეროპორტში: დომოდედოვოში, შერემეტიევოსა და ვნუკოვოში გეგმა «Ковёр» ამოქმედდა.
ათეულობით რეისი გადაიდო, ასევე, ბევრი რეისი შეყოვნებულია.
დრონი, რომელიც მოსკოვისკენ მიფრინავდა, ტვერის ოლქში, ერთ-ერთი ტბის თავზე ჩამოაგდეს. ნამსხვრევების ჩამოცვენის შედეგად ხანძარი გაჩნდა, რომელიც ლიკვიდირებულია.
გუშინ კი, მოსკოვის ცენტრში, სახაროვის გამზირზე, კუსტარულად დამზადებული უპილოტო საფრენი აპარატი შენიშნეს, რომელიც კაცის პორტფელში იდო. ადგილზე მისულმა სამართალდამცველებმა ის განყოფილებაში წაიღეს.
მოგვიანებით, ცნობილი გახდა, რომ დრონი საშიშროებას არ შეიცავდა: “იქ რაღაც ბავშვების სათამაშოების მსგავსი იყო: მავთულები, პატარა ნივთები… მოკლედ, არაფერი საშიში”, – მოჰყავს პოლიციელის ციტატა ერთ-ერთ გამოცემას.