თურქეთისა და რუსეთის პრეზიდენტების, რეჯეფ თაიფ ერდოღანისა და ვლადიმერ პუტინის შეხვედრა გაურკვეველი დროით, სულ მცირე სექტემბრამდე გადაიდო, – ინფორმაციას უცხოური მედია თავად ერდოღანზე დაყრდნობით ავრცელებს.
მისი განცხადებით, ის იმედოვნებს, რომ სექტემბერში პუტინთან შეხვედრას მოახერხებს და გეგმავს, რომ სხვა საკითხებთან ერთად, მასთან შავი ზღვის მარცვლეულის ინიციატივის მომავალზეც ისაუბროს.
“სექტემბერში გაიმართება G20-ის შეხვედრა ინდოეთში და გაეროს გენერალური ასამბლეის შეხვედრა შეერთებულ შტატებში. თუ ასეთ დატვირთულ გრაფიკში მოვახერხეთ შეხვედრა, მე და პუტინი პირადად შევხვდებით”, – განაცხადა უნგრეთიდან თურქეთში დაბრუნებულმა ერდოღანმა მედიასთან.
შეხვედრის პოტენციური ადგილი მან არ დააკონკრეტა.
ასევე, მედიის ცნობით, ვრცელდება ინფორმაცია, რომ შესაძლოა, თურქეთის საგარეო საქმეთა მინისტრი ჰაკან ფიდანი მალე რუსეთში ვიზიტით წავიდეს.