აგრესორი ქვეყნის თავდაცვის მინისტრი სერგეი შოიგუ ამტკიცებს, რომ რუსეთი, “ჰუმანიტარული მიზეზების გამო”, თავს იკავებს უკრაინაში კასეტური საბრძოლო მასალის გამოყენებისგან, “თუმცა, ეს გადაწყვეტილება შეიძლება გადაიხედოს“.

შოიგუს თქმითვე, “აშშ ადრე კასეტური საბრძოლო მასალის გამოყენებას ომის დანაშაულს უწოდებდა, დღეს კი ამ დანაშაულს უკრაინაში სჩადის“.

მისივე განცხადებით, ფინეთის ალიანსში შესვლის შემდეგ, ნატოს სამხედრო აქტივობა საგრძნობლად გააქტიურდა. შოიგუ ისევ იმუქრება, რომ მოსკოვი „ადეკვატურად უპასუხებს“ საფრთხეებსა და პროვოკაციების მცდელობებს.

შეგახსენებთ, 7 ივლისს შეერთებულმა შტატებმა უკრაინისთვის სამხედრო დახმარების ახალი პაკეტი გამოაცხადა, რომელიც კასეტურ საბრძოლო მასალას მოიცავს.

პენტაგონმა 14 ივლისს დაადასტურა, რომ საბრძოლო მასალები უკვე უკრაინაში იყო. აშშ-ის მოთხოვნით, უკრაინას მკაცრად აქვს შეზღუდული ის ტერიტორიები, სადაც ამ იარაღს გამოიყენებენ. უკრაინელი გენერლის, ოლექსანდრ ტარნავსკის თქმით, კასეტური საბრძოლო მასალის გამოყენება არ მოხდება არცერთ მჭიდროდ დასახლებულ ტერიტორიაზე, მათ შორის არც რუსეთის მიერ კონტროლირებად რეგიონებზე.

თავად რუსეთი კი უარყოფის მიუხედავად, ასეთ იარაღს უკრაინაში ომის მიმდინარეობისას აქტიურად იყენებს. კასეტური საბრძოლო მასალის ბოლო რამდენიმე შემთხვევა დაფიქსირდა 22 ივლისს დონეცკში, 26 ივლისს კოსტანტინოვკაში, 7 აგვისტოს ხარკოვში.