შინაგან საქმეთა მინისტრი ვახტანგ გომელაური ამბობს, რომ შოვში, სტიქიის ზონაში ერთი ავტომობილი იპოვეს. გომელაურის თქმით, დაკარგულად ითვლებიან მისი მფლობელები.

“სიახლე რაც არის, ერთი ავტომანქანა იქნა ნაპოვნი. შიგნით არავინ არ იყო, ცარიელი იყო ეს მანქანა, თუმცა მისი პატრონები, როგორც ვიცით, დაკარგულები არიან და ვეძებთ ამ ადამიანებს. დაიგეგმა უკვე ეს რომ დამთავრდება, შემდეგ რა უნდა გაკეთდეს, რა სამუშაოები, მდინარის პირას და მდინარის, ვთქვათ, კალაპოტის შეცვლა და გადამოწმება. ამას მერე დეტალურად, ალბათ, გეტყვიან თვითონ, გააკეთებენ განცხადებას,” – თქვა გომელაურმა.

საგანგებო სიტუაციების მართვის სამსახურის უფროსის თქმით კი, “ჰიუნდაის” მარკის ავტომობილში იმყოფებოდა 3 ადამიანი, რომელსაც ამ დრომდე კონკრეტულ ლოკაციებზე ეძებენ.

ცნობისთვის, რაჭაში მეწყერი 3 აგვისტოს ჩამოწვა. შსს მინისტრი სტიქიის ზონაში 13 აგვისტოს ჩავიდა.
ამ დროისთვის დადასტურებული ინფორმაციით, სტიქიას 24 ადამიანი ემსხვერპლა. 9 ადამიანს მაშველები ამ დრომდე ეძებენ.