ფარიკაობის საერთაშორისო ფედერაციამ შეცვალა ადრინდელი გადაწყვეტილება და გააუქმა უკრაინელი მოფარიკავის ოლგა ჰარლანის დისკვალიფიკაცია, რომელიც მას იმის გამო მისცეს, რომ რუს მეტოქეს, პაექრობის დასრულების შემდეგ, ხელი არ ჩამოართვა.
ოლგა ჰარლანმა ნეიტრალური დროშით მოასპარეზე ანა სმირნოვა დაამარცხა, მისთვის ხელის ჩამოსართმევად მიახლოებულ მეტოქეს კი დაშნა მიუშვირა და ახლოს მისვლის საშუალება არ მისცა.
საერთაშორისო რეგლამენტის მიხედვით, შეხვედრა დასრულებულად არ ითვლება, თუ მეტქოეები ერთმანეთს ხელს არ ჩამოართმევენ, ამიტომ ჰარლანმა დისკვალიფიკაცია მიიღო, მაგრამ მოგვიანებით ფედერაციამ გადახედა გადაწყვეტილებას, რადგან აღმოჩნდა, რომ რეგლამენტი რუსმა მოფარიკავემაც დაარღვია:
ჰარლანთან მომხდარი ინციდენტის შემდეგ მან ფოტო გადაიღო თავის ძმასთან, რომელიც რუსულ სამხედრო ფორმაში იყო გამოწყობილი. ფოტოზე სმირნოვას ძმის სამხედრო ქუდი ახურავს.
ამას გარდა, ფედერაციამ მიიჩნია, რომ უკრაინელ მოფარიკავეს ჰქონდა მეტოქისთვის ხელის არჩამორთმევის უფლება, რადგან ტურნირზე ჯერაც მოქმედებს კორონავირუსის გამო დაწესებული რეგლამენტი.
ასევე ცნობილი გახდა, რომ უკრაინის დელეგაციამ წინასწარ გააფრთხილა ფედერაცია, რომ უკრაინელი სპორტსმენები არ ჩამოართმევენ ხელს რუს სპორტსმენებს იმის მიუხედავად, რომ ეს უკანასკნელნი ჩემპიონატში ნეიტრალური დროშით მონაწილეობენ.