სურსათის ეროვნული სააგენტო მოსახლეობას მოუწოდებს, არ შეიძინოს ხორცი არაორგანიზებულ სავაჭრო ობიექტებში.
გავრცელებული ინფორმაციის თანახმად, სეს-მა დაავადებათა კონტროლისა და საზოგადოებრივი ჯანმრთელობის ეროვნული ცენტრიდან მიიღო შეტყობინება ტრიქინელოზის მეხუთე შემთხვევის დადასტურების შესახებ.
“ბოლო ორი თვის განმავლობაში ქვეყანაში დაფიქსირდა ტრიქინელოზის მეხუთე დადასტურებული შემთხვევა. სურსათის ეროვნული სააგენტო მოუწოდებს მოსახლეობას, არ შეიძინოს ხორცი არაორგანიზებულ სავაჭრო ობიექტებში, სადაც არ არის წარმოდგენილი ვეტერინარული ზედამხედველობის დამადასტურებელი დოკუმენტი – ფორმა 2! ტრიქინელოზი არის დაავადება, რომელიც ადამიანს შესაძლოა დაემართოს მიკროსკოპული პარაზიტით ტრიქინელოზით ინფიცირებული ცხოველების (ღორი, სხვა გარეული ცხოველი და ცხენი) ხორცის საკვებად მიღებისას. ხორცის დამარილება, შებოლვა და გაშრობა პარაზიტს არ კლავს”, – ნათქვამია სურსათის ეროვნული სააგენტოს განცხადებაში.
ტრიქინელოზით ინფიცირებული მეხუთე პაციენტი წყალტუბოს მუნიციპალიტეტიდანაა. მან ხორცი ქუთაისის ე.წ. ცენტრალურ ბაზარში შეიძინა.