წაგების მიუხედავად, ჩვენი გუნდი ვარჯიშს განაგრძობს, რადგან 2024 წელს პარიზის ოლიმპიადაზე მოხვედრის შანსი კიდევ აქვს. საამისოდ სხვადასხვა გარემოებათა თანხვედრაა საჭირო.
თუ ნახევარფინალში ერთდროულად გავლენ საფრანგეთი და ინგლისი, გაიმართება დამატებითი მატჩი ოლიმპიური საგზურისთვის მეოთხედფინალში დამარცხებულთაგან საუკეთესო გუნდებს შორის.
თუ დღეს ინგლისი მოუგებს პორტუგალიას, საფრანგეთი კი – უკრაინას, მაშინ საქართველოს ნაკრები გადის პლეი ოფში და ეთამაშება უკრაინას.
ამ მატჩში გამარჯვებული მოიპოვებს ოლიმპიადის საგზურს.
რაც შეეხება ინგლისსა და საფრანგეთს, ინგლისელები ვერ მიიღებენ ოლიმპიადის საგზურს, იმიტომ, რომ ასეთი უფლება მხოლოდ საერთაშორისო ოლიმპიური კომიტეტის წევრს აქვს – დიდ ბრიტანეთს და არა ინგლისს. საფრანგეთი კი ოლიმპიდის მასპინძელია და მონაწილეობა ავტომატურად აქვს განაღდებული.
შესაბამისად, საფრანგეთი და ინგლისი ოლიმპიადის საგზურისთვის არ იბრძვიან.