“ქართული ოცნების” დეპუტატი, ნინო წილოსანი ამბობს, რომ მმართველი გუნდის წევრებისთვის წითელი ხაზია რუსეთუმისა და მოღალატის დაძახება. ის მუქარის შემცველ განცხადებას აკეთებს და მოუწოდებს ყველას, არავინ გაბედოს წითელი ხაზების გადაკვეთა, თორემ მიიღებენ შესაბამის სიტყვიერ პასუხს.
ამავე კომენტარისას წილოსანმა ოპოზიცია და ოპოზიციური მედიების ჟურნალისტები დაადანაშაულა ძალადობის წახალისებაში. ჟურნალისტებმა მას “ფორმულას” ტელეწამყვანზე, მიშა მშვილდაძეზე მომხდარ თავდასხმასთან დაკავშირებით ჰკითხეს.
“სრულიად აბსურდული კავშირია ჩემ განცხადებას თუ ნებისმიერი ჩემი კოლეგის განცხადებას და ამ აღნიშნულ ფაქტთან დაკავშირებით. რა თქმა უნდა, ძალიან ცუდი ფაქტი იყო, აუცილებლად უნდა გამოიძიოს შესაბამისმა სტრუქტურებმა და დაისაჯონ ადამიანები. ყოველ შემთხვევაში, ძალიან ვისურვებდი, რომ ის ფონი, რომელიც არსებობს აი ამ რაღაც დაპირისპირების და რომელიც სისტემატურად არის წახალისებული ოპოზიციის, თუ ოპოზიციის მომხრე ჟურნალისტების მხრიდან, იყოს მაქსიმალურად ასე ვთქვათ ტემპერატურა დაწეული.
რაც შეეხება ქართული ოცნების განცხადებას, მეც პირადად და ყველა ჩემი კოლეგა ვაცხადებთ, რომ წითელი ხაზია მოღალატის და რუსეთუმეს ძახილი, ამის შემდეგ, ნებისმიერი, რომელიც აღნიშნულს არ გაითვალისწინებს, ჩვენგან მიიღებს შესაბამის სიტყვიერ პასუხს.
ჩვენ ვართ პოლიტიკოსები, ჩვენ არ ვსაუბრობთ ძალადობის ენით, ჩვენ ვსაუბრობთ სიტყვებით, განცხადებებით და მოწოდებებით, ამიტომ კიდევ ერთხელ მოვუწოდებ, არავინ აღარ გაბედოს წითელი ხაზების გადაკვეთა”, – თქვა ნინო წილოსანმა.
ცნობისთვის, 26 ივნისს, პარლამენტში, კულტურის კომიტეტის სხდომაზე “ქართული ოცნების” დეპუტატმა ბექა ოდიშარიამ თქვა, რომ ვინც მმართველი გუნდის წევრებს პრორუსს დაუძახებდა, მიიღებდა ცხვირ-პირში.
მსგავსი შინაარსის განცხადება 14 ივნისს ფრაქციის ლიდერმა, მამუკა მდინარაძემაც გააკეთა: “დედას შევიგინები, მაგ სიტყვას [რუსი] როგორც ახსენებთ”. 27 ივნისს პლენარულ სხდომაზე ნინო წილოსანმა თქვა, რომ მამუკაც და ბექაც თავის დაპირებას შეასრულებენ მათ მიმართ, ვინც პრორუსებს დაუძახებთ.