“ქართული ოცნების” თავმჯდომარე ამტკიცებს, რომ მათ ანტიდასავლური განცხადებები არასდროს არ გაუკეთებიათ. კობახიძის თქმით, “ოცნებას” “პროქართული და პროდასავლური” რიტორიკა აქვს და ამ ხაზს მიჰყვებიან.
“ჩვენ არასდროს არ გვქონია ანტიდასავლური განცხადებები. არცერთი ანტიდასავლური განცხადება არ გაგვიკეთებია. ჩვენ ხანდახან გვიწევდა, რა თქმა უნდა, შეფასებების გაკეთება მათ არაობიექტურ განცხადებებთან დაკავშირებით, თუმცა ეს, რა თქმა უნდა, არ არის ანტიდასავლური რიტორიკა. ჩვენი რიტორიკა არის პროქართული, პროდასავლური და ყოველთვის მივყვებით ამ ხაზს,” – განაცხადა კობახიძემ.
მმართველი გუნდის თავმჯდომარემ კანდიდატის სტატუსზეც ისაუბრა და განაცხადა, რომ სტატუსი ეკუთვნის როგორც ხალხს, ასევე ხელისუფლებას.
“რაც შეეხება 12 პუნქტს, ჩვენ პირნათლად შევასრულეთ, დასრულდება ეს პროცესი ბოლომდე, ამ თვის დასასრულს და, რა თქმა უნდა, გვეკუთვნის კანდიდატის სტატუსი. შარშან, ივნისშიც გვეკუთვნოდა და წელსაც გვეკუთვნის. ეს სტატუსი ეკუთვნის როგორც ხალხს, ასევე იმ ხელისუფლებას, რომელიც ამ ხალხმა აირჩია. ჩვენ გვაქვს ლეგიტიმაცია ხალხის მხრიდან და ეს ლეგიტიმაცია დასტურდება, მათ შორის, განახლებული სოციოლოგიური კვლევის მონაცემებით,” – აცხადებს კობახიძე.
შეგახსენებთ, ევროკომისია დღეს და ხვალ ევროკავშირის ელჩებსა და ევროპის საქმეთა მინისტრებს საქართველოს მიერ 12 პრიორიტეტის შესრულება-არშესრულებაზე მოხსენებას წარუდგენს. შეხვედრები ბრიუსელსა და სტოკჰოლმში გაიმართება.