შვედეთის პრემიერმინისტრის, ულაფ კრისტერსონის და თავდაცვის მინისტრის, პოლ ჯონსონის საერთო განცხადებაში ნათქვამია, რომ შვედეთი NATO-ს უფლებას მისცემს, ჯარები თავის ტერიტორიაზე განათავსოს მანამ, სანამ ის ოფიციალურად შეუერთდება თავდაცვის ალიანსს.

“მთავრობამ გადაწყვიტა, რომ შვედეთის შეიარაღებულმა ძალებმა შეიძლება განახორციელონ მზადება NATO-სა და NATO-ს წევრ ქვეყნებთან ერთად, რათა მომავალი ერთობლივი ოპერაციები უზრუნველყონ”. – ნათქვამია განცხადებაში.

მათივე თქმით, რუსეთი ახლო მომავალში მეზობელი ქვეყნებისთვის საფრთხედ დარჩება და რუსეთის პრეზიდენტის, ვლადიმირ პუტინს ტერიტორიული ამბიციების მასშტაბი გაურკვეველია.

“სამზადისი შეიძლება შედგებოდეს შვედეთის ტერიტორიაზე უცხოური აღჭურვილობისა და პერსონალის დროებით განთავსებაზე. გადაწყვეტილება მკაფიო სიგნალს უგზავნის რუსეთს და აძლიერებს შვედეთის თავდაცვას”. – ნათქვამია გაზეთ Dagens Nyheter-ში გამოქვეყნებულ მოსაზრებაში.

ფინეთმა და შვედეთმა NATO-ს წევრობის შესახებ განაცხადი გასულ წელს, რუსეთის მიერ უკრაინაში შეჭრის შემდეგ შეიტანეს. პროცესს თურქეთი და უნგრეთი აჭიანურებდნენ. თუმცა, 31 მარტს თურქეთის პარლამენტმა ფინეთის, შვედეთისგან დამოუკიდებლად, NATO-ში შესვლას მხარი ერთხმად დაუჭირა.

თურქეთი შვედეთის NATO-ში გაწევრიანებისგან თავს იკავებს იმ მიზეზით, რომ სტოკჰოლმი მფარველობს ეთნიკური ქურთების ჯგუფებს, რომლებიც ანკარას ტერორისტულ ორგანიზაციებად ჰყავს გამოცხადებული.