დიდმა ბრიტანეთმა ბელარუსის წინააღმდეგ სანქციების ახალი პაკეტი დააწესა. მისი მიზანი ექსპორტისა და რუსეთის მხრიდან სანქციების გვერდის ავლის შეზღუდვაა.
სანქციების ახალი პაკეტი ოქროს, ცემენტის, ხე-ტყისა და რეზინის იმპორტს კრძალავს. ასევე ფართოვდება სანქციების კრიტერიუმები, რაც მთავრობას საშუალებას აძლევს შეზღუდვები უფრო ფართო სპექტრზე გაავრცელოს, როგორიცაა თანაშემწეები, მრჩევლები, მინისტრები.
ბრიტანეთი ასევე ბლოკავს ქვეყნიდან ბელარუსში ბანკნოტებისა და აღჭურვილობის, საქონლის, ტექნოლოგიებისა და მასალების ექსპორტს, რომლებიც შეიძლება გამოყენებული იყოს ქიმიური და ბიოლოგიური იარაღის წარმოებისთვის.
ახალი ზომები ასევე აძლევს მთავრობას საფუძველს, რომ ბელარუსული მედია ორგანიზაციების პროპაგანდის გავრცელება არ მოხდეს დიდ ბრიტანეთში, მათ შორის ინტერნეტის საშუალებით.
“ახალი პაკეტი აძლიერებს ეკონომიკურ ზეწოლას ლუკაშენკოსა და მის რეჟიმზე, რომელიც აქტიურად უწყობს ხელს რუსეთის ომის ძალისხმევას და უგულებელყოფს უკრაინის ტერიტორიულ მთლიანობას.
ჩვენი მხარდაჭერა უკრაინისადმი მტკიცე დარჩება მანამ, სანამ საჭირო იქნება და დიდი ბრიტანეთი არ დააყოვნებს შემდგომი ზომების შემოღებას მათ წინააღმდეგ, ვინც მხარს უჭერს პუტინის ომს”, – თქვა ჯეიმს ქლევერლიმ.