კიევი ისევ მასობრივი იერიშის სამიზნეა. ვიტალი კლიჩკო დედაქალაქის მცხოვრებლებს მოუწოდებს, არ დატოვონ თავშესაფრები.
კიევის ზოგიერთ უბანში, ჰაერში განადგურებული რუსული რაკეტებისა და უპილოტო საფრენი აპარატების ნამსხვრევების ჩამოვარდნის შედეგად ხანძარია, ხოლო კიეველები მეტროში ათევენ ღამეს, გამუდმებული საჰაერო განგაშის გამო.
გოლოსევსკის რაიონი: მრავალსართულიანი სახლის მცხოვრებთა ევაკუაცია დაიწყო მას შემდეგ, რაც განადგურებული რაკეტის ნამსხვრევებმა სახლის ზედა სართულებზე ხანძარი გააჩინა. ვიტალი კლიჩკო იტყობინება ერთი დაზარალებულის შესახებ.
ხანძარია ასევე სვიატოშინსკის რაიონში, კლიჩკოს თქმით, შესაბამისი სამსახურები უკვე გავიდნენ ხანძრების სალიკვიდაციოდ.
კლიჩკო მოსახლეობას სიფრთხილისკენ მოუწოდებს, ხოლო ერმაკი – არ გადაიღონ ჰსთ სისტემების მუშაობის კადრები. შეგახსენებთ, მსგავსი კადრების გადაღების გამო 28-29 მაისის ღამეს 33 ადამიანი დააკავეს.