არ ვაწესებთ სანქციებს, მაგრამ არც ვიძლევით სანქციების გვერდის ავლის საშუალებას – ასე პასუხობს “ქართული ოცნების” თავმჯდომარე ნატოს გენერალური მდივნის განცხადებას, სადაც იენს სტოლტენბერგი ამბობს, რომ ალიანსი იმედოვნებს, რომ არაწევრი მოკავშირეები რუსეთის წინააღმდეგ დაწესებულ სანქციებს დაიცავენ და რუსეთს უკრაინის წინააღმდეგ აგრესიული ომის დაფინანსებას არ გაუადვილებენ:
“როგორც მოგეხსენებათ, ჩვენ გვაქვს მკაფიო პოზიცია ამ თემასთან დაკავშირებით – არ ვაწესებთ სანქციებს, მაგრამ არც ვიძლევით სანქციების გვერდის ავლის საშუალებას. თუ ვინმეს აქვს საუბარი სანქციების დაწესებაზე, სავაჭრო ეკონომიკური ურთიერთობების მთლიანად ჩაკეტვაზე, რა თქმა უნდა, ჩვენ ამას არ გავაკეთებთ” აცხადებს კობახიძე.
“ოცნების” თავმჯდომარე ღარიბაშვილის სიტყვებს იშველიებს, რომ ევროკავშირი 4 დღეში ვაჭრობს რუსეთთან იმას, რასაც საქართველო 1 წელში – “ყველა მოქმედებს საკუთარი ინტერესების შესაბამისად და ჩვენც ვმოქმედებთ ეროვნული ინტერესების შესაბამისად” აცხადებს კობახიძე.
ველით, რომ ნატო-ს არაწევრი მოკავშირეები დაიცავენ სანქციებს და რუსეთს უკრაინის წინააღმდეგ აგრესიული ომის დაფინანსებას და ორგანიზებას არ გაუადვილებენ” – ეს განცხადება ჩრდილოატლანტიკური ორგანიზაციის ხელმძღვანელმა ბრიუსელში, “გერმანიის მარშალის ფონდის” მიერ ორგანიზებული დისკუსიის დროს გააკეთა. მისივე თქმით, მნიშვნელოვანია საქართველო იმ დემოკრატიულ ღირებულებებს შეესაბამებოდეს, რომლისაც ნატოს სწამს.