გუშინ ლეგიონი «Свобода россии» შეიჭრა გრაივორონის ტერიტორიაზე (ბელგორიოდის ოლქი) და იქ რამდენიმე სოფელში გამაგრდა.
დღეს დამატებით გახდა ცნობილი, რომ დივერსიული სადაზვერვო ჯგუფები შევიდნენ კიდევ ორ სოფელში გორკოვსკისა და შეტინოვკაში, ასევე, აიღეს დასახლება ბოგუნ-გოროდოკი. და ეს ყველაფერი ისე, რომ მათ სერიოზული წინააღმდეგობა არ შეხვედრიათ.
“სვობოდა როსიის” ლეგიონში აცხადებენ, რომ რუსეთს არ გააჩნია რეზერვი, რათა დაიცვას ბელგოროდის ოლქი, რადგან ყველა რუსი ჯარისკაცი ან ომშია ჩართული, ან დაჭრილია, ან მკვდარი.
კრემლში აცხადებენ, რომ სიტუაცია შემაშფოთებელია და დიდ ძალისხმევას მოითხოვს, მაგრამ ჯერჯერობით არც უშიშროების საბჭოს საგანგებო სხდომის მოწვევას აპირებენ. პესკოვი ბელგოროდის ოლქში შეჭრილებს “უკრაინელ ბოევიკებად” მოიხსენიებს, დიმიტრი მედვედევი კი ამბობს, რომ “ისინი ვირთხებივით უნდა გაჟუჟო”.
უკრაინის ოფიციალური პირები აცხადებენ, რომ ბელგოროდის ოლქში მიმდინარე მოვლენები “რუსეთის შიდა საქმეა” და რომ მასში “მხოლოდ რუსეთის მოქალაქეები” მონაწილეობენ.